सेवाग्राहीबाट प्राप्त गुनासोहरूको सम्बोधन तथा विगतमा माननीय मन्त्री र मन्त्रालयबाट दिइएका निर्देशनहरूको कार्यान्वयन अवस्थाबारे जानकारी लिन संस्कृति, पर्यटन तथा नागरिक उड्डयन मन्त्रालयको टोलीले हिजो मंगलवार त्रिभुवन अन्तर्राष्ट्रिय विमानस्थल क्षेत्रको स्थलगत अनुगमन गरेको छ।

अनुगमनका क्रममा नागरिक उड्डयन कार्यालयले विमानस्थलको सरसफाइ, व्यवस्थापन तथा सेवा प्रवाहमा उल्लेखनीय सुधार गरेको मन्त्रालयले जनाएको छ।

यात्रु सेवामा सहजता ल्याउन तथा विमानस्थलको समग्र व्यवस्थापन सुधार गर्न गरिएका प्रयासहरूको सकारात्मक प्रभाव देखिएको अनुगमन टोलीको निष्कर्ष रहेको छ।

टोलीले विमानस्थलका विभिन्न सेवा क्षेत्रहरूको निरीक्षण गर्दै यात्रुहरूको सुविधा, सरसफाइको अवस्था, सूचना प्रवाह तथा सेवा व्यवस्थापनको मूल्याङ्कन गरेको छ ।

अनुगमनका क्रममा देखिएका सुधारलाई निरन्तरता दिन तथा बाँकी रहेका चुनौतीहरूको समाधानका लागि सम्बन्धित निकायलाई आवश्यक सुझाव र निर्देशन समेत दिइएको समेत जनाएको छ।

मन्त्रालयले विमानस्थल सेवाको गुणस्तर अझ प्रभावकारी र यात्रुमैत्री बनाउन आगामी दिनमा थप सुधारात्मक कार्यक्रमहरू सञ्चालन गर्ने जनाएको छ।