अस्ट्रेलियाका आगामी मे ३ मा आम चुनाव हुने भएको छ । अस्ट्रेलियाका प्रधानमन्त्री एन्थोनी अल्बनीजले शुक्रबार संसद् विघटन गर्दै चुनावको घोषणा गरेका हुन् । 

अस्ट्रेलियामा हरेक ३ वर्षभित्र प्रतिनिधि सभाको चुनाव गर्नुपर्ने कानुनी व्यवस्था छ । पछिल्लो पटक सन् २०२२ मे २१ मा आम चुनाव भएको थियो ।

चुनावी सर्वेक्षणहरूले २ प्रमुख राजनीतिक दलहरू लेबर पार्टी र लिबरल पार्टीबिच कडा प्रतिस्पर्धा हुने देखाएका छन् । कसैको स्पष्ट बहुमत नआउने र दुवै दलले स्वतन्त्र सांसद वा अन्य साना दलहरूमाथि निर्भर हुनुपर्ने सम्भावना देखिएको छ।

अस्ट्रेलियामा हुन लागेको नयाँ चुनावको प्रभाव त्यहाँ रहेका र जान खोजिरहेका नेपालीमा समेत पर्नेछ ।

यदि वर्तमान लेबर पार्टीले आगामी चुनाव जितेको खण्डमा अन्तर्राष्ट्रिय विद्यार्थीसँगै अन्य आप्रवासीमाथिको कडाइ जारी रहनेछ । लिबरल पार्टीले सरकार बनाएको खण्डमा भने अन्तर्राष्ट्रिय विद्यार्थी वा आप्रवासीप्रतिको हालको नीति बदलिन सक्छ ।

यस्तोमा अस्ट्रेलियामा रहेको नेपाली समुदायले आगामी चुनावलाई निकै चासोका साथ हेरिरहेका छन् ।