आफ्नो ऊर्जा पूर्वाधारमाथि आक्रमण जारी रहे पश्चिम एसियाका अन्य ऊर्जा केन्द्रहरू पनि निशानामा पर्ने चेतावनी इरानले दिएको छ । इरानको अर्धसरकारी समाचार संस्था फार्स न्युज एजेन्सीले एक अज्ञात सैन्य स्रोतलाई उद्धृत गर्दै जनाएअनुसार इरानले अमेरिकी वा इजरायली स्वामित्व अथवा लगानी रहेका क्षेत्रीय तेल तथा ग्यास संरचनाहरूलाई वैध सैन्य लक्ष्य मान्ने बताएको छ ।

स्रोतका अनुसार इरानका ऊर्जा केन्द्रहरूमा थप आक्रमण भए अमेरिका र इजरायलसँग सम्बन्धित सबै तेल तथा ग्यास पूर्वाधार लक्षित गरिनेछ । इरानको इस्लामिक रिभोलुसनरी गार्ड कर्प्स (आईआरजीसी) ले सोमबार जारी गरेको वक्तव्यमा इजरायलले महशहरस्थित पेट्रोकेमिकल केन्द्रमा गरेको आक्रमणको जवाफस्वरूप इजरायलको हाइफा क्षेत्रमा रहेको ऊर्जा पूर्वाधारमाथि क्षेप्यास्त्र प्रहार गरिएको जनाएको छ ।

आईआरजीसीले इजरायलले खतरनाक खेल सुरु गरेको आरोप लगाउँदै अब द्वन्द्वको दायरा सम्पूर्ण क्षेत्रका ऊर्जा संरचनासम्म फैलिन सक्ने चेतावनी दिएको छ ।

इरानको अर्को अर्धसरकारी समाचार संस्था तस्नीम न्युज एजेन्सीका अनुसार दक्षिण पश्चिम इरानको महशहर विशेष आर्थिक क्षेत्रमा रहेको कारुन पेट्रोकेमिकल कम्पनी आक्रमणको चपेटामा परेको छ । हालसम्म मानवीय क्षति नभएको जनाइएको छ भने भौतिक क्षतिको विवरण सङ्कलन भइरहेको बताइएको छ । 

फार्स न्युजले सार्वजनिक गरेको भिडियोमा हाइफातर्फ प्रहार गरिएको भनिएको इरानी क्षेप्यास्त्रमा अङ्ग्रेजी, हिब्रु र फारसी भाषामा ‘तिमीहरूलाई यसको पछुतो हुनेछ’ भन्ने सन्देश लेखिएको देखिएको दाबी गरिएको छ ।

यसअघि पनि इजरायल र अमेरिकासँगको युद्धका क्रममा इरानले अमेरिकी सहयोगी खाडी राष्ट्रहरूका ऊर्जा केन्द्रहरूलाई लक्षित गरेको थियो । जसका कारण तेल उत्पादन तथा निर्यात प्रभावित भएर अन्तर्राष्ट्रिय बजारमा बच्चा तेलको भाउ ह्वात्तै बढेको थियो ।