विदेश जान पासपोर्ट लिएर तयारी अवस्थामा हुनुहुन्छ ?  फ्लाइट नजिकिँदै छ  तर अध्यागमन डेस्कमै रोकिनुभयो भने ? विदेशको तालिम, सम्मेलन वा कुनै विशेष कार्यक्रममा सहभागी हुन पाउने मौका पाउनु भनेको रोमाञ्चक कुरा हो । एक त सिकाइको मौका, अर्को धेरै देशका आफू जस्तै व्यक्तिसँगको इन्टरयाक्सन,   सँगै नयाँ देश, शहर घुम्ने अवसर पनि । तर तपाईकै सानो हेलचेक्यइले अध्यागमनमा जाँचमा यात्रा नै रोकिने परिस्थिति आयो भने ?

अध्यागमनका कर्मचारीले सोध्नेछन् । के के कागजात छ ?

 ए तपाईसँग भएको कागजात पुगेन । यस्तो सुन्नु पर्यो भने ? अन्तिम समयको यो समस्या तपाईले झेल्नु नपरोस् । तपाईलाई एयरपोर्ट इमिग्रेसनमा तनाब नहोस् भनेर यो भिडियोमा हामीले साथमा हुनुपर्ने ८ कागजातबारे जानकारी गराँदैछौ । भिडियो अन्तिमसम्म हेर्नुहोला ।

१. वैध पासपोर्ट

तपाईंको पासपोर्ट कम्तीमा पनि ६ महिनाभन्दा बढीको वैधता भएको हुनुपर्छ। पासपोर्ट पुरानो वा च्यातिएको छ भने नयाँ पासपोर्ट लिएर मात्र यात्रा गर्नुहोला।

२. गन्तव्य मुलुकको वैध भिसा

यदि तपाईं भिसा-अन-अराइभल पाउने देशमा जानुहुन्न भने, तपाईंले पहिले नै भिसा प्राप्त गरेको हुनुपर्छ। भिसामा स्पष्ट रूपमा यात्रा प्रयोजन उल्लेख भएको हुनु अनिवार्य छ।

३. दुईतर्फी हवाई टिकट

अध्यागमन अधिकारीहरूले तपाईं फर्किने मिति पक्का गर्न चाहन्छन्। त्यसैले जान र फर्कने दुवै टिकटको कपी साथमा हुनुपर्छ ।

४. बोर्डिङ पास

फ्लाइट चढ्नुअघि बोर्डिङ पास निकाल्नुभएको छ भने त्यसको प्रिन्ट वा मोबाइलमा सुरक्षित कपी देखाउनुहोस्।

५. स्पोन्सर लेटर वा आर्थिक प्रमाण

यदि तपाईंलाई कुनै संस्थाले कार्यक्रमको खर्च बेहोरेको हो भने त्यसको स्पोन्सर लेटर देखाउनुहोस्। अन्यथा, कम्तीमा १ हजार अमेरिकी डलर नगद वा कार्डमा भएको प्रमाणसहित होटेल बुकिङको कपी पनि देखाउनु आवश्यक हुन्छ।

६. कार्यक्रमको आमन्त्रण पत्र

तपाईं सहभागी हुन लागेको तालिम, सम्मेलन वा कार्यक्रममा आयोजक संस्थाबाट प्राप्त आमन्त्रण पत्र अत्यन्तै महत्वपूर्ण कागजात हो। यसमा तपाईंको नाम, कार्यक्रमको मिति, स्थान र विवरण स्पष्ट हुनुपर्छ।

७. सिफारिस पत्र र परिचयपत्र

जहाँ तपाईं कार्यरत हुनुहुन्छ, त्यो सङ्घ/संस्थाको सिफारिस पत्र  र तपाईंको ID Card पनि साथमा हुनुपर्छ । यसले तपाईंको पेसागत परिचय र यात्रा उद्देश्य पुष्टि गर्छ ।

८. डलर सटहीको भर्पाई वा भौचर

तपाईंले पासपोर्टमा डलर सटही गर्नुभएको भए, त्यसको प्रमाण (भर्पाई वा भौचर) पनि देखाउनुपर्छ। यो कागजातले तपाईंले कानुनी तरिकाबाट विदेशी मुद्रा लिएको पुष्टि गर्छ ।

विदेश यात्राको पहिलो सफल कदम हो सही कागजात । त्यसैले आशा छ अब तपाईको यात्रा सफल हुने छ ।