अमेरिकी राष्ट्रपति डोनाल्ड ट्रम्पले संसद्मा पेस गरेको ‘अ बिग ब्युटिफुल बिल’ विधेयकले गर्दा निकै ठुलो सङ्ख्यामा अमेरिकीहरूले स्वास्थ्य पहुँच गुमाउन सक्ने देखिएको छ ।

बिबिसीका अनुसार यो विधेयक पास भएमा १ करोड २० लाख अमेरिकीहरूले स्वास्थ्य बिमा गुमाउन सक्ने छन् ।

विधेयकले ३ दशमलव ३ ट्रिलियन ऋण समेत थप्न सक्ने बिबिसीले उल्लेख गरेको छ ।

शनिबार जारी गरिएको ९४० पृष्ठको सो विधेयकले ट्रम्पको पहिलो कार्यकालको मुख्य विधायिकी उपलब्धि २०१७ को कर कटौतीलाई विस्तार गर्नेछ ।

यस्तै, विधेयकले कर घटाउने, औषधि उपचार कोषमा कटौती गर्ने, पोषण सहायता कटौती गर्ने तथा सेना र आप्रवासन नीति कार्यान्वयनमा खर्च बढाउने छ ।

विधेयकमा रिपब्लिकनहरूको वर्चस्व रहेको र औषधोपचार कोषमा निर्भर ग्रामीण क्षेत्रका अस्पतालहरूलाई मद्दत गर्न थप कोषको पनि व्यवस्था गरेको छ ।

रिपब्लिकन दलका नेताहरूले ट्रम्पको जुलाई ४ को समय सीमाअघि नै विधेयकलाई सिनेटबाट पारित गर्ने तयारी गरेका छन् ।

यो विधेयकलाई लिएर अहिले अमेरिकाभर पक्ष र विपक्षमा बहस सुरु भएको छ ।

डेमोक्रेटिक सासंदहरुले भने विधेयकको चर्को विरोध गरेका छन् ।