वैदेशिक रोजगारीमा ठगी
ग्रिस पठाइदिने भन्दै ठगी गरेको आरोपमा एक जना पक्राउ
आप्रवासन
आकर्षक तलब सुविधाको प्रलोभनमा पारी वैदेशिक रोजगारीका लागि ग्रिस पठाइदिने भन्दै रकम ठगी गरेको आरोपमा एक जना पक्राउ परेका छन् ।
पीडितको उजुरीका आधारमा प्रहरीले भक्तपुर मध्यपुर थिमी नगरपालिका-९ बस्ने धादिङ नेत्रावती गाउँपालिका-५ घर भएका २९ वर्षीय सुदिप सापकोटालाई शनिबार पक्राउ गरेको हो ।
सुदिपमाथि ग्रिस पठाइदिन्छु भन्दै १ जना पीडितबाट २ लाख ४० हजार रुपैयाँ लिई सम्पर्कविहीन भएको पीडितको उजुरी छ ।
सोही उजुरीका आधारमा काठमाडौँ उपत्यका अपराध अनुसन्धान कार्यालय टेकुबाट खटिएको प्रहरीले उनलाई काठमाडौँ महानगरपालिका-१५ बाट पक्राउ गरेको हो ।
सुदिपमाथि आवश्यक अनुसन्धान तथा कारबाहीको लागि वैदेशिक रोजगार विभाग पठाइएको छ ।
