अमेरिकी राष्ट्रपति डोनाल्ड ट्रम्पले उत्तर कोरियाका राष्ट्रपति किम जोङ उनलाई यसै वर्ष भेट्ने इच्छा जाहेर गरेका छन् ।

ह्वाइट हाउसमा दक्षिण कोरियाली राष्ट्रपति ली जे म्युङसँगको भेटघाटका क्रममा ट्रम्पले किमसँग यसै वर्ष आफूले भेट्न चाहेको बताएका हुन् ।

ट्रम्पले भने, “मेरो र उत्तर कोरियाली नेताबिच धेरै राम्रो सम्बन्ध छ । म उनलाई बुझ्छु, मैले उनको साथ धेरै समय बिताएको छु, हामीले सायद छलफल गर्न नहुने विषयहरूमा कुरा गरेका छौँ । मलाई उनको साथ धेरै राम्रो लाग्छ । मलाई लाग्छ कि उनको देशमा अपार सम्भावनाहरू छन् ।”

विभाजन र युद्धको घाउ निको पार्ने वाचा गरेका दक्षिण कोरियाका नयाँ राष्ट्रपति लीले ट्रम्पसँगको भेटमा आफू समेत उत्तर कोरियाली समकक्षीलाई भेट्न पर्खिरहेको बताएका थिए ।

“मलाई आशा छ कि तपाईँले कोरियाली प्रायद्वीपमा शान्ति ल्याउन सक्नुहुन्छ, तपाईँ किमसँग भेट्न सक्नुहुन्छ र उत्तर कोरियामा ट्रम्प टावर बनाउन सक्नुहुन्छ ताकि म त्यहाँ गल्फ खेल्न सकूँ,” लीले भने।

त्यसपछि ट्रम्पलाई ओभल अफिसमा उपस्थित पत्रकारहरूले यस वर्ष वा अर्को वर्ष किमसँग भेट्नुहुन्छ भनेर प्रश्न गरेका थिए ।

जसको जवाफमा ट्रम्पले भने, “म यसै वर्ष उनलाई भेट्न चाहन्छु ।”