इरानले आफ्नो मुद्रा रियालबाट चारवटा शून्य हटाउने भएको छ । यो कदमपछि १० हजार रियालको मूल्य एक रियाल हुनेछ । यो प्रस्तावलाई इरानी संसद्ले सहमति  दिएको छ । उक्त निर्णय देशमा बढ्दो महँगीका कारण उठाइएको हो ।

हाल अन्तर्राष्ट्रिय बजारमा एक अमेरिकी डलरको मूल्य ११ लाख ५० हजार रियाल पुगेको छ । यो प्रस्ताव धेरै वर्षदेखि तयार गरिँदै आएको बताइएको छ ।

इरानी संसद्को आर्थिक समितिका प्रमुख शम्सोल्दिन हुसेनले यो परिवर्तन दुई वर्षपछि लागु हुने सरकारी टेलिभिजनलाई बताएका छन् । परिवर्तनपछि पनि पुरानो रियाल मुद्रालाई तीन वर्षसम्म प्रयोग गर्न सकिनेछ ।

यो कदम मुख्यतः मुद्राको अवमूल्यन र उच्च मुद्रास्फीतिसँग जुध्नका लागि चालिएको समाचारमा उल्लेख छ । इरानमा विगत लामो समयदेखि मुद्रास्फीति ३०–४० प्रतिशतभन्दा माथि रहँदै आएको छ । मे २०२५ मा यो दर ३८.७ प्रतिशत थियो ।

रियालको मूल्य अत्यधिक घटेको छ । एक अमेरिकी डलरका लागि लगभग ११ लाख ५० हजार रियाल लाग्छ । यसले बिल, बैंक स्टेटमेन्ट र दैनिक खरिद–बिक्रीमा ठूला–ठूला संख्याहरूको प्रयोग गर्नुपर्ने भएकाले प्रणाली जटिल बनेको छ ।

ठूला नोटहरू छाप्न र व्यवस्थापन गर्न धेरै खर्च लाग्ने गरेको छ । साना संख्याहरू प्रयोग गर्दा छपाइ र लजिस्टिक्स सस्तो हुनेछ ।