अमेरिकाका राष्ट्रपति डोनाल्ड ट्रम्प फेरि एक पटक विवादमा तानिएका छन् । टर्कीकी ५५ वर्षीया नागरिक नेक्ला ओजमेनले आफू ट्रम्पको जैविक छोरी भएको दाबी गरेकी छन् । उनले डीएनए परीक्षणमार्फत सत्य पत्ता लगाउन चाहेको बताएकी छन् ।

टर्कीको हुर्रियत पत्रिकासँग कुरा गर्दै ओजमेनले भनिन्, “म उहाँलाई कुनै समस्या गराउन चाहन्नँ । म केवल सत्य जान्न चाहन्छु ।” ट्रम्प सहमत भएमा डीएनए परीक्षणबाट आफ्नो दाबी प्रमाणित गर्न सकिने उनको भनाइ छ । ट्रम्प राम्रो पिता हुने विश्वास व्यक्त गर्दै उनले आफूलाई अस्वीकार नगर्ने आशा पनि गरेकी छन् ।

ओजमेन अंकारामै साती र दुर्सुन ओजमेनको छोरीका रूपमा हुर्किएकी थिइन् । तर सन् २०१७ मा आमाले आफूलाई दत्तक लिइएको जानकारी दिएको उनको भनाइ छ । आमाको गर्भपतनपछि ‘सोफिया’ नामकी एक अमेरिकी महिलाले आफ्नी छोरी उनीहरूलाई सुम्पिएको र उक्त बच्चा डोनाल्ड ट्रम्पसँगको सम्बन्धबाट जन्मिएको दाबी गरिएको ओजमेनले बताइन् ।

हाल ओजमेनसँग आफ्नो दाबी पुष्टि गर्ने ठोस प्रमाण छैन । तर उनले आफू, ट्रम्प र उनका सन्तानको अनुहार मिल्दोजुल्दो रहेको दाबी गरेकी छन् । ट्रम्प डीएनए परीक्षणमा सहमत हुनेमा आफू आशावादी रहेको पनि उनले बताइन् ।

गत सेप्टेम्बरमा अंकारास्थित पारिवारिक अदालतले ओजमेनको पितृत्व परीक्षणसम्बन्धी माग अस्वीकार गरेको थियो । प्रस्तुत प्रमाण पर्याप्त नभएको ठहर अदालतको थियो । टर्कीको कानुनअनुसार, विशेषगरी विदेशी नागरिक संलग्न मुद्दामा डीएनए परीक्षणको माग गर्न ठोस प्रमाण आवश्यक पर्छ ।

अदालतको निर्णयबाट ओजमेन निराश भने भइनन् । उनले उक्त फैसलाविरुद्ध पुनरावेदन अदालतमा निवेदन दिएकी छन् । साथै, टर्कीस्थित अमेरिकी दूतावास र अमेरिकी अदालतहरूमा पनि निवेदन पठाइसकेको बताउँदै त्यहाँबाट प्रतिक्रियाको प्रतीक्षामा रहेको उनको भनाइ छ ।