अमेरिकी राष्ट्रपति डोनाल्ड ट्रम्प यही साता चीन भ्रमणमा जाँदै छन् । यस भ्रमणका क्रममा उनले चिनियाँ समकक्षी सि जिनपिङसँग ताइवानलाई अमेरिकी हतियार बिक्री तथा जेलमा रहेका हङकङेली सञ्चार व्यवसायी जिम्मी लाईको विषयमा छलफल गर्ने बताएका छन् ।

ह्वाइट हाउसमा पत्रकारहरूसँग कुरा गर्दै ट्रम्पले ताइवानको रक्षा समर्थनबारे प्रश्न उठ्दा “राष्ट्रपति सीसँग म त्यसबारे छलफल गर्नेछु” भने । अमेरिकाले ताइवानलाई हतियार बिक्री नगरोस् भन्ने चीनले चाहेको उल्लेख गर्दै यो आफूले उठाउने धेरै विषयमध्ये एक हुने बताए ।

चीनले लोकतान्त्रिक रूपमा शासित ताइवानलाई आफ्नो भूभाग भएको दाबी गर्दै आएको छ, तर ताइवानले उक्त दाबी अस्वीकार गर्दै आएको छ । अमेरिकाले “एक चीन नीति” अवलम्बन गरे पनि ताइवानको सार्वभौमिकताबारे स्पष्ट धारणा नलिई चीनको अवस्थालाई स्वीकार गर्ने नीति अपनाएको छ । साथै, अमेरिकी कानुनअनुसार वासिङ्टन ताइवानको सुरक्षामा सहयोग गर्न बाध्य छ । 

ताइवानलाई अमेरिकी हतियार बिक्री लामो समयदेखि अमेरिका–चीन सम्बन्धमा तनावको मुख्य कारण बन्दै आएको छ । गत डिसेम्बरमा ट्रम्प प्रशासनले ताइवानका लागि ११ अर्ब डलरभन्दा बढीको सबैभन्दा ठुलो अमेरिकी हतियार प्याकेज घोषणा गरेको थियो । हालैका दिनमा ट्रम्पका सहयोगीहरूले ताइवानलाई आफ्नो रक्षा खर्च अझ बढाउन आग्रह गरेका छन् । यद्यपि एक अमेरिकी अधिकारीका अनुसार ट्रम्प–सी शिखर बैठकले ताइवानसम्बन्धी अमेरिकी नीतिमा कुनै परिवर्तनको संकेत गरेको छैन ।

पत्रकारहरूसँग कुरा गर्दै ट्रम्पले आफ्नो कार्यकालमा ताइवानलाई लिएर सैन्य तनाव बढ्ने सम्भावना कम रहेको पनि बताए । “मलाई लाग्दैन त्यस्तो हुन्छ,” उनले भने, “हामी ठिक उनेछौँ । मेरो राष्ट्रपति सीसँग निकै राम्रो सम्बन्ध छ । उहाँलाई थाहा छ कि त्यस्तो होस् भन्ने म चाहन्नँ ।”