ताइवान वरपर चिनियाँ युद्धक विमान दिनहुँ उड्नु सामान्यजस्तै भइसकेको छ । हरेक दिन धेरथोर विमानहरू ताइवान नजिक उडिरहेको देख्न सकिन्छ । तर अमेरिकी राष्ट्रपति डोनाल्ड ट्रम्पले चीनको राजकीय भ्रमण सुरु गरेर चिनियाँ राष्ट्रपति सी जिनपिङसँग महत्त्वपूर्ण वार्ता गरिरहेका बेला ताइवान आसपास चिनियाँ युद्धक विमानको गतिविधि रोकिएको छ ।

ताइवानको रक्षा मन्त्रालयका अनुसार शुक्रबारसम्मको पछिल्लो २४ घण्टामा ताइवान वरपरको आकाशमा कुनै पनि चिनियाँ युद्धक विमान देखिएनन् । यद्यपि, चीनका सात नौसैनिक जहाज भने ताइवान आसपासका समुद्री क्षेत्रमा सञ्चालनमा रहेको पाइएको बताइएको छ ।

ताइवानलाई चीनले आफ्नो भूभागको हिस्सा दाबी गर्दै आएको छ । चीनको सत्तारूढ कम्युनिस्ट पार्टीले ताइवानसँग ‘पुनः एकीकरण’ गर्ने प्रतिबद्धता दोहोर्‍याउँदै आएको छ । राष्ट्रपति सी जिनपिङले आवश्यक परे सैन्य शक्ति प्रयोग गर्न सकिने चेतावनी पनि दिएका छन् ।

पछिल्ला पाँच वर्षमा चीनले ताइवान नजिक पठाउने सैन्य विमानहरूको सङ्ख्या उल्लेखनीय रूपमा बढाएको छ । तर फेब्रुअरीको अन्त्यदेखि मार्चसम्म करिब दुई सातासम्म चिनियाँ युद्धक विमानको गतिविधि रोकिएको थियो, जुन ताइवानले सार्वजनिक रूपमा दैनिक सैन्य तथ्याङ्क प्रकाशित गर्न थालेपछि सबैभन्दा लामो शान्त अवधि मानिएको थियो । 

त्यतिबेला विश्लेषकहरूले विभिन्न अनुमान गरेका थिए । एउटा प्रमुख धारणाअनुसार ट्रम्प र सी जिनपिङबिच हुने तय गरिएको बैठकअघि तनाव नबढाउन चीनले जानाजानी सैन्य गतिविधि कम गरेको हुनसक्ने बताइएको थियो । उक्त बैठक पछि स्थगित गरिएको थियो ।