साउदी अरब सरकारले श्रम कानुन उल्लङ्घन गर्ने कम्पनीहरूविरुद्ध देशव्यापी कडा कारबाही सुरु गरेको छ। यस अभियानअन्तर्गत ७ हजार २ सयभन्दा बढी वर्क भिसा रद्द गरिएको अन्तर्राष्ट्रिय सञ्चारमाध्यमहरूले जनाएका छन्।

साउदीको मानव संसाधन तथा सामाजिक विकास मन्त्रालयले श्रम नियम पालना नगर्ने कम्पनीहरूमा व्यापक अनुगमन गरेपछि यस्तो कदम चालिएको हो। पहिलो त्रैमासिकमा मात्रै करिब २ लाख ५० हजार कम्पनीमा निरीक्षण गरिएको र हजारौं श्रमसम्बन्धी उल्लङ्घन फेला परेको बताइएको छ।

विशेषगरी गलत रोजगार सम्बन्ध, अवैध कामदार प्रयोग, नियमविपरीत भिसा प्रयोग तथा श्रमिक अधिकार उल्लङ्घन गर्ने कम्पनीहरूलाई लक्षित गरेर कारबाही गरिएको जनाइएको छ। कारबाहीपछि ती कम्पनीहरूको सरकारी सेवा समेत रोक्का गरिएको छ।

यो निर्णय साउदी जाने तयारीमा रहेका नेपाली कामदार र हाल साउदीमा कार्यरत नेपालीहरूका लागि पनि महत्वपूर्ण चेतावनीका रूपमा हेरिएको छ। वैदेशिक रोजगारीमा जाँदा कम्पनीको वैधानिकता, भिसाको अवस्था र श्रम सम्झौता राम्रोसँग बुझेर मात्र जानुपर्ने आवश्यकता अझ बढेको विज्ञहरू बताउँछन्।

साउदी सरकारले पछिल्लो समय अवैध श्रमिक, नक्कली सम्झौता र नियमविपरीत काम गराउने कम्पनीहरूमाथि लगातार कडाइ गर्दै आएको छ। यसअघि पनि श्रम नियम उल्लङ्घन गर्ने दर्जनौं रिक्रुटमेन्ट कार्यालय बन्द गरिएको थियो।

विशेषज्ञहरूका अनुसार नेपाली कामदारहरूले म्यानपावर कम्पनीमार्फत विदेश जानुअघि कम्पनीको वास्तविक मागपत्र, काम, तलब र भिसा प्रक्रिया राम्रोसँग जाँच गर्नुपर्छ। गलत कम्पनी वा अवैध प्रक्रियामा फस्दा भिसा रद्द हुने, पक्राउ पर्ने वा डिपोर्ट हुन सक्ने जोखिम रहने चेतावनी दिइएको छ।