अमेरिकी नौसेनाले पाँच दिनसम्म ओमानको खाडी क्षेत्रमा रोकेपछि इराकी कच्चा तेल बोकेको सुपरट्याङ्कर एगियोस फ्यानोरियस प्रथम पुनः भियतनामतर्फ प्रस्थान गरेको छ । अन्तर्राष्ट्रिय समाचार संस्था रोयटर्सले एलएसईजीको जहाज आवागमनसम्बन्धी तथ्याङ्कलाई उद्धृत गर्दै उक्त जानकारी दिएको हो ।

माल्टाको झन्डा बोकेको उक्त विशाल तेलवाहक जहाज मे १० मा स्ट्रेट अफ होर्मुज पार गरेर ओमानको खाडी क्षेत्रमा पुगेको थियो । त्यसपछि मे ११ मा जहाजले अचानक दिशा परिवर्तन गर्दै यु–टर्न लिएको थियो । तथ्यांकअनुसार जहाजले मे १६ बाट पुनः भियतनामतर्फ यात्रा सुरु गरेको हो ।

उक्त जहाज मे ३० मा सन् रिफाइनरी पुग्ने अपेक्षा गरिएको छ, जहाँ इराकी कच्चा तेल झारिनेछ । अमेरिकी सेनाको मध्य कमान्ड (सेन्टकम)ले गत साता उक्त जहाजलाई इरानविरुद्ध जारी नाकाबन्दी कार्यान्वयनका क्रममा पुनः मार्ग परिवर्तन गर्न लगाइएको जनाएको थियो ।