युएईमा दिउँसो बाहिर काम गर्न प्रतिबन्ध जुन १५ देखि लागू, उल्लंघन गरे ५०,००० दिरामसम्म जरिवाना
संगम पहरी
यूएईमा काम गर्ने नेपाली श्रमिकका लागि महत्वपूर्ण सूचना आएको छ। मानव संसाधन तथा इमिरेटाइजेसन मन्त्रालय (MOHRE) ले जुन १५ देखि सेप्टेम्बर १५ सम्म लागू हुने गरी दिउँसोको समयमा खुला आकाशमुनि काम गर्न प्रतिबन्ध लगाउने भएको छ। यो नियमअनुसार दिउँसो १२:३० बजेदेखि ३ बजेसम्म प्रत्यक्ष घाम र खुला ठाउँमा काम गराउन पाइने छैन।
यो वार्षिक मध्याह्न कार्य प्रतिबन्ध यूएईमा लगातार २२औँ वर्ष लागू हुन लागेको हो। मन्त्रालयका अनुसार यसको उद्देश्य गर्मीयाममा कामदारलाई तातोका कारण हुन सक्ने स्वास्थ्य जोखिम, विशेषगरी heat-related injury बाट जोगाउनु हो। नेपाली कामदारहरू निर्माण, सरसफाइ, डेलिभरी, मर्मत र अन्य बाहिरी क्षेत्रमा ठूलो संख्यामा कार्यरत भएकाले यो नियम उनीहरूका लागि विशेष रूपमा महत्वपूर्ण मानिएको छ।
नयाँ नियमअन्तर्गत कम्पनीहरूले कामदारका लागि छायाँयुक्त विश्रामस्थल, पंखा, पर्याप्त पिउने पानी र hydration का लागि आवश्यक सुविधा उपलब्ध गराउनुपर्नेछ। मन्त्रालयले तातो मौसममा कामदारको स्वास्थ्य सुरक्षालाई प्राथमिकता दिन कम्पनीहरूलाई स्पष्ट जिम्मेवारी दिएको छ।
तर केही काम भने यस प्रतिबन्धबाट छुट पाउनेछन्। प्राविधिक कारणले रोक्न नमिल्ने asphalt paving र concrete pouring, साथै पानी, बिजुली र यातायात जस्ता अत्यावश्यक सेवामा तत्काल गर्नुपर्ने emergency repairs मा काम गर्न पाइनेछ। सार्वजनिक जीवन र आवतजावतमा असर पर्ने विशेष सरकारी अनुमति आवश्यक पर्ने काम पनि यसै सूचीमा पर्छन्।
मन्त्रालयले नियम उल्लंघन गर्ने कम्पनीमाथि कडा जरिबाना लगाइने जनाएको छ। एक कामदारसम्बन्धी उल्लंघनका लागि ५ हजार दिरहम जरिबाना लाग्नेछ भने धेरै कामदारलाई एउटैपटक नियमविपरीत काम गराएमा कुल जरिबाना ५० हजार दिरहमसम्म पुग्न सक्छ।
गएको वर्ष पनि मन्त्रालयको Heat Stress Protection अभियानअन्तर्गत कम्पनीहरूको ९९ प्रतिशत पालना देखिएको थियो। त्यतिबेला देशभर डेलिभरी राइडरहरूका लागि १० हजारवटा वातानुकूलित विश्रामस्थलसमेत उपलब्ध गराइएको थियो। यसले यूएईले गर्मीमा श्रमिक सुरक्षा कति गम्भीर रूपमा लिन्छ भन्ने देखाउँछ।
यूएईमा कार्यरत नेपाली श्रमिकका लागि यसको अर्थ स्पष्ट छ—दिउँसोको खुला आकाशमुनि काम गर्ने दबाब बढेमा वा कम्पनीले नियम नमान्दा तुरुन्त सम्बन्धित निकायमा जानकारी दिन सकिनेछ। गर्मीयाममा कार्यस्थल सुरक्षा, पानी, छायाँ र आरामको व्यवस्था आफ्नै अधिकार हो भन्ने कुरा यस नियमले फेरि सम्झाएको छ।
