पोर्चुगलले रेसिडेन्स पर्मिट,पिआर आवेदन सम्बन्धी व्यवस्थामा हेरफेर गरेको छ । पोर्चुगलको एजेन्सी फर इन्ट्रिग्रेसन, माइग्रेसन एन्ड असाइलमले आवश्यक सबै कागजातहरू पेस नगरी पिआर प्राप्ति र नवीकरणका आवेदन स्वीकार गर्न बन्द गरेको हो।

अब सबै कागजात पूर्ण रूपमा पेस गर्ने आवेदकको मात्र पिआर प्राप्ति वा नवीकरणको पक्रिया अघि बढ्ने छ ।

पोर्चुगलमा पिआर पाउन वा नवीकरण गराउन वैध पासपोर्ट, वैध भिसा वा अस्थायी बसोबास अनुमतिको प्रमाण, पर्याप्त आम्दानीको प्रमाण र आवासको प्रमाणपत्र जस्ता कागजात आवश्यक पर्छन् ।

यस्तै, आपराधिक रेकर्ड नभएको चारित्रिक प्रमाणपत्रसँगै रोजगारी वा अध्ययनको प्रमाण जस्ता थप कागजातहरू आवश्यक पर्न सक्छन् । तर आवेदकहरूले सम्पूर्ण कागजात बिनै पिआर आवेदन दिने क्रम बढेपछि पछिल्लो निर्णय आएको हो ।

पोर्चुगलमा ठुलो सङ्ख्यामा नेपालीहरू छन् र धेरै जना पिआर पाउन सहज हुन्छ भन्ने हेतुले त्यहाँ पुग्ने गरेका छन् । पछिल्लो नियमले त्यहाँ रहेका नेपालीलाई समेत असर पर्ने देखिन्छ ।

गत सेप्टेम्बरसम्मको तथ्याङ्कअनुसार पोर्चुगलमा वैध हैसियतमा २९ हजार ९७२ जना नेपाली छन् । यो पोर्चुगलमा रहेका कुल आप्रवासीको जनसङ्ख्याको २ दशमलव ९ प्रतिशत र आठौँ सर्वाधिक हो ।