साउदी अरबको कडा चेतावनी, भिसाको म्याद नाघे ५० हजार रियाल जरिवाना, जेल र देशनिकाला

साउदी अरबले भिसाको अवधि सकिएपछि पनि देशभित्र बसिरहने विदेशी नागरिकलाई कडा कानुनी कारबाही गर्ने चेतावनी दिएको छ। साउदी गृह मन्त्रालयले प्रवेश भिसाको म्याद सकिएपछि पनि देश नछाड्ने विदेशीले ५० हजार साउदी रियालसम्म जरिवाना, छ महिनासम्म कैद र त्यसपछि देशनिकालासमेत भोग्नुपर्ने जनाएको छ।

मन्त्रालयका अनुसार प्रवेश भिसाको अवधि समाप्त भएपछि साउदी अरबमा बसिरहनु अध्यागमन कानुनको गम्भीर उल्लंघन हो। यस्तो कार्यले देशको आवास, श्रम तथा सीमा सुरक्षासम्बन्धी कानुनको उल्लंघन गर्ने भएकाले दोषीमाथि कडा कानुनी कारबाही गरिने स्पष्ट गरिएको छ।

साउदी सरकारले सबै विदेशी नागरिकलाई आफ्नो भिसाको अवधि नियमित रूपमा जाँच गर्न, म्याद समाप्त हुनुअघि नै देश छाड्न र कुनै पनि प्रकारको ओभरस्टे नगर्न आग्रह गरेको छ। साथै, नागरिक तथा आप्रवासीलाई भिसा, आवास वा श्रम कानुन उल्लंघन गर्ने व्यक्तिबारे सम्बन्धित निकायमा जानकारी गराउन पनि अनुरोध गरिएको छ। मक्का, मदिना, रियाद तथा पूर्वी प्रान्तमा ९११ र अन्य क्षेत्रमा ९९९ नम्बरमा सम्पर्क गरेर यस्ता उल्लंघनको सूचना दिन सकिने मन्त्रालयले जनाएको छ।

यो चेतावनी साउदी सरकारले अध्यागमन तथा श्रम कानुनको कार्यान्वयनलाई थप कडा बनाइरहेको समयमा आएको हो। पछिल्ला महिनाहरूमा अवैध बसोबास, श्रम कानुन उल्लंघन र सीमा सुरक्षा नियमविपरीत गतिविधिविरुद्ध देशव्यापी निगरानी र कारबाहीलाई तीव्र बनाइएको छ।

यो सूचना साउदी अरबमा कार्यरत तथा भ्रमण, उमराह वा अन्य प्रयोजनका लागि जाने नेपालीका लागि विशेष महत्वपूर्ण मानिएको छ। भिसाको म्याद सकिएपछि देशमै बसिरहँदा ठूलो आर्थिक जरिवाना, जेल सजाय, देशनिकाला र भविष्यमा पुनः साउदी प्रवेशमा प्रतिबन्धसमेत लाग्न सक्ने भएकाले समयमै कानुनी प्रक्रिया पूरा गर्न विशेषज्ञहरूले सुझाव दिएका छन्।

साउदी अरब नेपाली श्रमिकको प्रमुख वैदेशिक रोजगार गन्तव्य भएकाले त्यहाँ रहेका नेपालीले आफ्नो भिसा, इकामा तथा अन्य अध्यागमनसम्बन्धी कागजातको म्याद नियमित रूपमा जाँच गर्नुपर्ने आवश्यकता झन् बढेको छ। विशेषगरी रोजगारदाता परिवर्तन, बिदा, भ्रमण वा अन्य कारणले भिसाको अवधि सकिन लागेको अवस्थामा सम्बन्धित निकाय वा रोजगारदातासँग समयमै समन्वय गर्न पनि आग्रह गरिएको छ।