नेपालले साढे पाँच वर्षमा गर्यो २५ सय बढी विदेशीलाई डिपोर्ट, सबैभन्दा धेरै चिनियाँ नागरिक
आप्रवासन
नेपालले पछिल्ला साढे पाँच वर्षमा विभिन्न अवैध गतिविधिमा संलग्न २ हजार ५५७ जना विदेशी नागरिकलाई देश निकाला (डिपोर्ट) गरेको छ। अध्यागमन विभागको तथ्यांकअनुसार डिपोर्ट हुनेमध्ये सबैभन्दा धेरै चिनियाँ नागरिक रहेका छन्।
बाह्रखरीले अध्यागमन विभाग र नेपाल प्रहरीको तथ्यांकका आधारमा सार्वजनिक गरेको विवरणअनुसार सन् २०२१ देखि सन् २०२६ जुलाई २६ सम्म डिपोर्ट गरिएका विदेशीमध्ये २७.१८ प्रतिशत चिनियाँ नागरिक छन्। विभागका निर्देशक तथा प्रवक्ता टीकाराम ढकालका अनुसार पछिल्ला वर्षहरूमा नेपालबाट सबैभन्दा धेरै डिपोर्ट हुने विदेशी चिनियाँ नागरिक नै रहेका छन्।
अध्यागमन विभागका अनुसार सन् २०२६ को जनवरी १ देखि जुलाई २६ सम्म मात्रै २८७ जना विदेशी नागरिकलाई नेपालबाट निष्कासित गरिएको छ। केही समयअघिसम्म प्रहरीले पक्राउ गरेर अध्यागमन विभागमा बुझाएपछि मात्र कारबाही प्रक्रिया अघि बढ्ने व्यवस्था रहे पनि पछिल्ला महिनादेखि विभाग आफैँ सक्रिय भएर अवैध गतिविधिमा संलग्न विदेशीलाई नियन्त्रणमा लिई अनुसन्धानपछि डिपोर्ट गर्न थालेको जनाएको छ।
नेपालमा भिसाको उद्देश्यविपरीत बसोबास गर्ने, लागूऔषध कारोबार, मानव बेचबिखन, संगठित अपराध, विदेशी मुद्रा अपचलन, अभद्र व्यवहार तथा अन्य आपराधिक गतिविधिमा संलग्न विदेशी नागरिकलाई कानुनी प्रक्रिया पूरा गरी देश निकाला गर्ने गरिएको विभागले जनाएको छ।
तथ्यांकअनुसार सन् २०२५ मा मात्रै ५२३ जना विदेशी नागरिक डिपोर्ट भएका थिए। तीमध्ये ४०९ जना भिसाको अवधि सकिएपछि पनि नेपालमा बसिरहेका ‘ओभरस्टे’ गर्ने विदेशी थिए। उक्त वर्ष १२० जना चिनियाँ, ७५ जना बंगलादेशी, ३५ जना अमेरिकी, २२ जना बेलायती, १८ जना पाकिस्तानीसहित अन्य विभिन्न देशका नागरिकलाई निष्कासित गरिएको थियो।
सन् २०२४ मा ५०१ जना, सन् २०२३ मा ४५८ जना, सन् २०२२ मा ५७० जना र सन् २०२१ मा २१८ जना विदेशी नागरिक नेपालबाट डिपोर्ट भएका थिए। विभागको तथ्यांकले पछिल्ला वर्षहरूमा डिपोर्ट हुने विदेशीको संख्या उच्च स्तरमै रहेको देखाउँछ।
पछिल्ला केही महिनामा ठमेल, दरबारमार्गलगायत पर्यटकीय क्षेत्रमा सञ्चालन गरिएको विशेष निगरानीका क्रममा अनैतिक गतिविधिमा संलग्न ५७ जना विदेशी महिलालाई पनि पक्राउ गरिएको थियो। नेपाल प्रहरीका अनुसार तीमध्ये ४७ जनालाई अध्यागमन विभागमार्फत डिपोर्ट गरिसकिएको छ भने बाँकीमाथि अनुसन्धान भइरहेको छ।
अध्यागमन विभागको अर्को तथ्यांकअनुसार सन् २०१४ देखि सन् २०२६ जुलाई २६ सम्मको साढे १२ वर्षको अवधिमा नेपालले कुल ५ हजार ५९६ जना विदेशी नागरिकलाई देश निकाला गरिसकेको छ।
विभागले पर्यटक भिसा वा अन्य भिसामा नेपाल प्रवेश गरेर भिसाको दुरुपयोग गर्ने तथा कानुनविपरीत गतिविधिमा संलग्न विदेशीमाथि निगरानी अझ कडा बनाइएको जनाएको छ।
समाचार स्रोत: बाह्रखरी (अध्यागमन विभाग र नेपाल प्रहरीको तथ्यांकका आधारमा)।
