जापानले विदेशी श्रमिकका लागि SSW प्रणाली परिवर्तन गर्दै, २०२७ देखि नयाँ मापदण्ड

जापानले विदेशी श्रमिकलाई लक्षित Specified Skilled Worker (SSW) No.1 प्रणालीमा थप कडाइ गर्ने निर्णय गरेको छ। सन् २०२७ अप्रिल १ देखि लागू हुने नयाँ व्यवस्थाअनुसार रोजगारदाताले विदेशी श्रमिकलाई दिने सहयोग प्रणाली थप व्यवस्थित बनाउनुपर्नेछ भने केही श्रमिकले SSW भिसामा प्रवेश गर्नुअघि अनिवार्य रूपमा दुईवटा परीक्षा उत्तीर्ण गर्नुपर्ने व्यवस्था लागू हुनेछ।

Migrant Times का अनुसार नयाँ नियमअन्तर्गत विदेशी श्रमिकलाई प्रत्यक्ष सहयोग गर्ने रोजगारदाताले प्रत्येक कार्यस्थलमा पूर्णकालीन कर्मचारी वा पदाधिकारीमध्येबाट सपोर्ट म्यानेजर र सपोर्ट स्टाफ नियुक्त गर्नुपर्नेछ। दर्ता भएका सपोर्ट संस्थाले पनि आफ्ना प्रत्येक कार्यालयमा यस्तै जिम्मेवार कर्मचारी तोक्नुपर्नेछ। एउटै व्यक्तिले आवश्यक परे दुवै जिम्मेवारी सम्हाल्न सक्ने व्यवस्था गरिएको छ।

नियुक्त गरिएका जिम्मेवार व्यक्तिले मात्र विदेशी श्रमिकलाई आधिकारिक सहयोग उपलब्ध गराउन पाउनेछन्। साथै सपोर्ट म्यानेजरले अध्यागमन कानुन, श्रम कानुन तथा विदेशी श्रमिकको व्यवस्थापनसँग सम्बन्धित विषयमा सरकारले तोकेको तालिम अनिवार्य रूपमा पूरा गर्नुपर्नेछ।

नयाँ व्यवस्थाले प्राविधिक प्रशिक्षार्थी (Technical Intern) वा पुरानो तालिम प्रणालीअन्तर्गत प्रशिक्षण पूरा गरेका विदेशी नागरिकलाई पनि असर गर्नेछ। सन् २०२७ अप्रिल १ पछि उनीहरू SSW No.1 भिसामा परिवर्तन हुन चाहेको अवस्थामा सम्बन्धित पेशागत सीप परीक्षण र सरकारले मान्यता दिएको जापानी भाषा परीक्षा दुवै उत्तीर्ण गर्नुपर्नेछ। यसअघि केही श्रेणीका प्रशिक्षार्थीलाई सीधा SSW मा परिवर्तन गर्न सहज व्यवस्था रहेको थियो।

जापान सरकारले विदेशी श्रमिकको व्यवस्थापनलाई थप पारदर्शी, व्यवस्थित र जिम्मेवार बनाउने उद्देश्यले यी परिवर्तन गरेको जनाएको छ। विदेशी श्रमिकलाई उचित सहयोग उपलब्ध गराउने, रोजगारदाताको उत्तरदायित्व स्पष्ट गर्ने तथा श्रमिकको भाषा र सीपको स्तर सुनिश्चित गर्ने लक्ष्यका साथ नयाँ नियम ल्याइएको हो।

नेपालबाट हरेक वर्ष कृषि, खाद्य उत्पादन, होटल, निर्माण, वृद्ध हेरचाहलगायत विभिन्न क्षेत्रमा SSW भिसामार्फत ठूलो संख्यामा युवाहरू जापान जाने गरेका छन्। नयाँ नियम लागू भएपछि जापान जान इच्छुक नेपालीले जापानी भाषा र सीप परीक्षणको तयारी अझ व्यवस्थित रूपमा गर्नुपर्ने तथा रोजगारदाताको सहयोग प्रणालीसमेत थप औपचारिक हुने अपेक्षा गरिएको छ।