रियाद विमानस्थलमा अब ‘साइलेन्ट एयरपोर्ट’, यात्रुले यसरी हेर्नुपर्नेछ उडानको सूचना

साउदी अरबको राजधानी रियादस्थित किङ खालिद अन्तर्राष्ट्रिय विमानस्थलले यात्रुका लागि नयाँ ‘साइलेन्ट एयरपोर्ट’ प्रणाली लागू गर्न थालेको छ। विमानस्थलको टर्मिनल–५ बाट सुरु गरिएको पहिलो चरणअन्तर्गत यात्रुहरूलाई पटक–पटक गरिने सार्वजनिक ध्वनि घोषणालाई घटाएर उडानसम्बन्धी सूचना डिजिटल माध्यमबाट उपलब्ध गराइने भएको हो।

नयाँ प्रणालीअन्तर्गत टर्मिनलभित्र हुने सामान्य ध्वनि घोषणा धेरै हदसम्म हटाइनेछ भने आवश्यक सूचना मुख्यतः प्रस्थान गेटमा मात्र दिइनेछ। यात्रुहरूले आफ्नो उडानको समय, गेट परिवर्तन तथा अन्य आवश्यक जानकारी विमानस्थलका डिजिटल स्क्रिन, वेबसाइट र अन्य विद्युतीय माध्यमबाट हेर्नुपर्नेछ।

विमानस्थलका अनुसार यस प्रणालीको मुख्य उद्देश्य टर्मिनलभित्रको अनावश्यक आवाज कम गर्दै यात्रुलाई शान्त र सहज वातावरण उपलब्ध गराउनु हो। यद्यपि यात्रुको उडानसँग सम्बन्धित अत्यावश्यक सूचना भने उपलब्ध भइरहनेछ र आवश्यक अवस्थामा प्रस्थान गेटबाट प्रत्यक्ष घोषणा गरिनेछ।

यात्रुहरूले उडानसम्बन्धी जानकारी विमानस्थलको वेबसाइट, डिजिटल सूचना बोर्ड तथा ह्वाट्सएप सेवामार्फत प्राप्त गर्न सक्नेछन्। विमानस्थलले यात्रुलाई सहयोग गर्न ‘आस्क मी’ ग्राहक सेवा टोलीसमेत परिचालन गर्ने जनाएको छ।

यो प्रणाली तत्काल सबै टर्मिनलमा लागू गरिएको भने होइन। टर्मिनल–५ बाट सुरु गरिएको पहिलो चरणको अनुभवका आधारमा परियोजनालाई क्रमशः अन्य क्षेत्रमा विस्तार गर्ने तयारी छ। थप चरण कहिले र कुन टर्मिनलमा लागू गर्ने भन्ने विवरण पछि सार्वजनिक गरिने विमानस्थलले जनाएको छ।

रियाद विमानस्थल हुँदै यात्रा गर्ने नेपाली यात्रुका लागि पनि यो परिवर्तन महत्वपूर्ण हुनेछ। विशेषगरी अब विमानस्थलमा हुने सार्वजनिक उद्घोषणामा मात्र भर नपरी डिजिटल स्क्रिन तथा उपलब्ध विद्युतीय माध्यमबाट आफ्नो उडानको जानकारी नियमित रूपमा जाँच गर्नुपर्नेछ।