गल्छीमा बाढीबाट १२० परिवार पूर्ण रूपमा विस्थापित, लत्ताकपडा र भाँडाकुँडाको चरम अभाव
आप्रवासन
गत बुधबार भोटेकोशी नदीमा आएको विनाशकारी बाढीका कारण धादिङको गल्छी गाउँपालिकामा २८२ परिवार प्रत्यक्ष रूपमा प्रभावित भएका छन् ।
गाउँपालिकाले सङ्कलन गरेको प्रारम्भिक विवरण अनुसार वडा नम्बर ६ सबैभन्दा बढी प्रभावित भएको छ । वडा नम्बर ४, ८ र १ मा पनि ठुलो क्षति पुगेको गाउँपालिकाका प्रमुख प्रशासकीय अधिकृत पूर्णप्रसाद दुलालले जानकारी दिए ।
दुलालका अनुसार पालिकाका विभिन्न वडामा ठुलो भौतिक क्षति भएको छ ।
विपद्का समयमा गल्छीबाट नुवाकोट र रसुवातर्फ गएका १० जना स्थानीय सम्पर्कविहीन भएका थिए । तीमध्ये एक जनाको शव फेला परेको छ भने ९ जना अझै बेपत्ता रहेको प्रमुख प्रशासकीय अधिकृत दुलालले जानकारी दिए ।
उनकाअनुसार अहिले १२० परिवार पूर्ण रूपमा विस्थापित भई अस्थायी रूपमा बसोबास गरिरहेका छन् । पालिकाले पूर्ण र आंशिक क्षतिको विस्तृत विवरण सङ्कलन गर्ने कार्यलाई अन्तिम चरणमा पुर्याएको छ ।
खाद्यान्न व्यवस्था के छ ?
प्रभावित परिवारहरूका लागि गाउँपालिकाले तत्काल राहत स्वरूप प्रतिपरिवार दुई बोरा चामलसहित तेल, दाल, नुन र मसलाजस्ता अत्यावश्यक खाद्य सामग्री घरघरमै पुर्याएको छ । विश्व खाद्य कार्यक्रमले आगामी तीन महिनासम्मका लागि खाद्यान्न सहयोग गर्ने प्रतिबद्धता जनाएको छ ।
विस्थापित भएकाहरूका लागि दुई स्थानमा ‘होल्डिङ सेन्टर’ सञ्चालन गरिएको छ । जहाँ करिब १८० जनाले नियमित रूपमा खाना खाइरहेका छन् । विभिन्न दातृ निकाय र संघसंस्थाहरूबाट पनि राहत सामग्री प्राप्त हुने क्रम जारी छ । गाउँपालिकाका पीडितका लागि खाद्यान्न पुग्दो रहेको दुलाल बताउँछन् ।
लत्ताकपडा र भाँडा आवश्यक
खाद्यान्नको समस्या तत्कालका लागि समाधान भए तापनि पीडितहरूलाई अन्य आधारभूत सामग्रीको चरम अभाव देखिएको छ । धेरैजसो मानिस ज्यान जोगाउन एकसरो लुगामा घरबाट निस्किएका कारण उनीहरूका लागि फेर्ने लुगा र सुत्नका लागि सिरक–डसनाको अभाव छ ।
उद्धार र राहतमा समन्वय अभाव झेल्दै स्थानीय सरकार
शोकमा डुबेको गोसाईंकुण्ड : पालिका भवन बगरमा, उपाध्यक्षसहित २८ जना बेपत्ता
विनाशकारी बाढीले तारकेश्वरको मन्दिर र पुल बगायो, तारुकाको बस्ती जोखिममा
'विपद्मा केन्द्र सरकारले हामीसँग समन्वय त परै जाओस्, आएको राहतसमेत बाटोमै रोकिदियो'
विदुर नगरपालिकाका ३११ जना बेपत्ता, प्रभावितका लागि खाद्यान्न पर्याप्त तर औषधिको अभाव
बेलकोटगढीको मुख्य सडक ठप्प, कर्मचारीको कार्यशैलीमाथि मेयरको आक्रोश
आमाछोदिङमो गाउँपालिका सडक सञ्जालबाट विच्छेद, बाढीपछि भोकमरीको जोखिम
‘नदीको किनारमा छरिएका शवले दुर्गन्ध फैलिन थालिसक्यो, संघ सरकारले हामीलाई जिम्मा दिएन’
‘तत्कालका लागि टेन्ट, खाना पकाउने चुलो, ग्यास सिलिन्डर, भाँडाकुँडा र उज्यालोका लागि सोलार लाइटको आवश्यकता छ’ दुलालले भने । जिल्ला प्रशासन कार्यालयमार्फत पनि केही राहत सामग्री प्राप्त भएको र वितरण कार्य भइरहेको उनको भनाइ छ ।
स्वास्थ्य र मनोपरामर्श
करोडौँको धनमाल क्षति भएका कारण पीडितहरू मानसिक रूपमा निकै विचलित अवस्थामा छन् । उनीहरूको स्वास्थ्य अवस्थालाई ध्यानमा राख्दै गाउँपालिकाले मोबाइल स्वास्थ्य टिम परिचालन गरेको छ । जसमा डाक्टरहरूसहित मनोपरामर्शदाताहरूको टोलीले पीडितहरूलाई परामर्श र उपचार सेवा प्रदान गरिरहेको छ ।
गाउँपालिकाले उपलब्ध स्रोत र साधनको प्रयोग गरी राहत र पुनःस्थापनाको कार्यलाई उच्च प्राथमिकतामा राखेको प्रमुख प्रशासकीय अधिकृत दुलालले बताए ।
