जापानमा नेपाली लाइसेन्स प्रमाणीकरणको झन्झट हट्यो, दूतावासबाटै हुने

जापानमा नेपाली सवारी चालक अनुमतिपत्र प्रयोग गरी जापानी सवारी चालक अनुमतिपत्र प्राप्त गर्न चाहने नेपालीका लागि प्रक्रिया थप सरल भएको छ। नेपाली राजदूतावास टोकियोले नेपाली सवारी चालक अनुमतिपत्रको प्रमाणीकरणसम्बन्धी प्रक्रियामा परिवर्तन गरिएको जानकारी दिएको हो।

दूतावासले जारी गरेको सूचनाअनुसार यसअघि जापानमा सवारी चालक अनुमतिपत्र प्राप्त गर्ने प्रयोजनका लागि नेपाली सवारी चालक अनुमतिपत्रलाई पहिले सम्बन्धित यातायात व्यवस्था कार्यालयको पत्रका आधारमा त्रिभुवनस्थित कन्सुलर सेवा विभागबाट प्रमाणीकरण गराउनुपर्ने व्यवस्था थियो। त्यसपछि मात्रै उक्त अनुमतिपत्रलाई नेपाली राजदूतावास, टोकियोबाट समेत प्रमाणीकरण गराउनुपर्ने प्रक्रिया रहेको थियो।

अब भने उक्त प्रक्रिया हटाइएको छ। नयाँ व्यवस्थाअनुसार नेपाली सवारी चालक अनुमतिपत्रको प्रमाणीकरण नेपाली राजदूतावास, टोकियोबाटै सिधै गरिने भएको छ। अर्थात्, यसअघि अनिवार्य रहेको कन्सुलर सेवा विभागबाट गराउनुपर्ने प्रमाणीकरणको चरण अब आवश्यक नपर्ने भएको हो।

जापानको सम्बन्धित निकायबाट सवारी चालक अनुमतिपत्र प्राप्त गर्ने उद्देश्यले नेपाली सवारी चालक अनुमतिपत्र प्रमाणीकरण गराउनुपर्ने नेपालीका लागि यो परिवर्तनले प्रक्रिया छोट्याउने भएको छ। यससँगै नेपालमा छुट्टै प्रमाणीकरण गराउनुपर्ने झन्झट तथा समय बचत हुने अपेक्षा गरिएको छ।

राजदूतावासले नयाँ व्यवस्थाबारे सम्बन्धित सबैको जानकारीका लागि सूचना जारी गर्दै अबदेखि नेपाली सवारी चालक अनुमतिपत्रलाई दूतावासबाटै सिधै प्रमाणीकरण गरिने जनाएको छ।

यस व्यवस्थाबाट जापानमा बसोबास गरिरहेका नेपाली, विशेषगरी नेपाली सवारी चालक अनुमतिपत्रका आधारमा जापानी ड्राइभिङ लाइसेन्स प्राप्त गर्ने प्रक्रियामा रहेका व्यक्तिहरूलाई सहज हुने देखिएको छ। यद्यपि, जापानमा नेपाली लाइसेन्सका आधारमा जापानी सवारी चालक अनुमतिपत्र प्राप्त गर्ने क्रममा आवश्यक अन्य कागजात, परीक्षा वा सम्बन्धित जापानी निकायका प्रक्रिया भने आफ्नै नियमअनुसार पूरा गर्नुपर्ने हुन्छ।

यो परिवर्तन विशेषगरी जापानमा ड्राइभिङ लाइसेन्स बनाउन चाहने नेपालीका लागि महत्वपूर्ण मानिएको छ, किनकि नेपाली लाइसेन्स प्रमाणीकरणका लागि अब नेपालमै रहेको कन्सुलर सेवा विभागसम्म पुगेर थप प्रमाणीकरण गराउनुपर्ने चरण हटेको छ।