साउदीमा घरेलु श्रमिकले परीक्षण अवधिमै फाइनल एक्जिट लिन सक्ने
संगम पहरी
काठमाडौं । साउदी अरबले घरेलु श्रमिकका लागि नयाँ व्यवस्था लागू गरेको छ। अब रोजगार सम्झौताको ९० दिने परीक्षण अवधिमै घरेलु श्रमिकको अन्तिम बहिर्गमन (फाइनल एक्जिट) भिसा जारी गर्न सकिने भएको छ।
साउदीको राहदानीसम्बन्धी महानिर्देशनालयले तोकेको व्यवस्थाअनुसार, घरेलु श्रमिकको आवासीय अनुमति (इकामा) जारी नभइसकेको अवस्थामा पनि निश्चित शर्त पूरा भएमा रोजगारदाताले फाइनल एक्जिट भिसा लिन सक्नेछन्। यो प्रक्रिया विद्युतीय माध्यमबाट ‘अब्सर’ प्लेटफर्ममार्फत पूरा गर्न सकिनेछ।
व्यवस्थाअनुसार फाइनल एक्जिट भिसा जारी हुने समयमा सम्बन्धित श्रमिक साउदी अरबमै रहेको हुनुपर्नेछ। श्रमिकको मृत्यु भएको वा कामबाट अनुपस्थित रहेको विवरण दर्ता भएको हुनु हुँदैन। त्यस्तै, श्रमिकको नाममा बाँकी ट्राफिक जरिवाना हुनु हुँदैन र राहदानी कम्तीमा ६० दिनका लागि वैध हुनुपर्नेछ।
साउदीको मानव संसाधन तथा सामाजिक विकास मन्त्रालयअन्तर्गतको नियमअनुसार घरेलु श्रमिक र रोजगारदाताबीच लिखित रोजगार सम्झौता हुनुपर्छ। उक्त सम्झौतामा बढीमा ९० दिनसम्मको परीक्षण अवधि राख्न सकिने व्यवस्था छ।
परीक्षण अवधिको मुख्य उद्देश्य रोजगारदाताले श्रमिकको काम गर्ने क्षमता र व्यवहार मूल्यांकन गर्नु हो। यही अवधिमा रोजगारदाताले पनि रोजगार सम्बन्ध अन्त्य गर्न सक्नेछन् भने घरेलु श्रमिकले पनि सम्झौता अन्त्य गर्न पाउने व्यवस्था छ।
यस्तै, एउटै रोजगारदाताले एउटै घरेलु श्रमिकलाई सामान्य अवस्थामा एक पटकभन्दा बढी परीक्षण अवधिमा राख्न पाउने छैन। तर दुवै पक्षको सहमतिमा श्रमिकलाई पहिलेको भन्दा फरक काममा राखिएको अवस्थामा भने पुनः परीक्षण अवधि राख्न सकिनेछ।
यो व्यवस्था साउदी अरबमा घरेलु कामका लागि जाने नेपाली श्रमिकका लागि पनि महत्वपूर्ण हुन सक्छ। विशेषगरी रोजगार सुरु गरेपछि प्रारम्भिक अवधिमै कामको सम्बन्ध अन्त्य गर्नुपर्ने अवस्था आएमा फाइनल एक्जिट प्रक्रियालाई स्पष्ट बनाउने उद्देश्यले यो व्यवस्था उपयोगी हुने देखिन्छ।
स्रोत: Gulf News
