युरोपेली सङ्घ (ईयू)को नयाँ डिजिटल सीमा प्रणाली इन्ट्रीरएक्जिट सिष्टम (ईईएस) शुक्रबारदेखि पूर्ण रूपमा लागू गर्ने लक्ष्य राखिएको छ । 

यस प्रणालीअन्तर्गत यात्रुहरूले पासपोर्ट स्क्यानसँगै आफ्नो फिङ्गरप्रिन्ट र फोटो पनि दर्ता गर्नुपर्ने हुन्छ । यो प्रणाली ईयूका २९ देशहरू समेटिएको शेन्जेन सीमाका सबै सीमा नाकाहरूमा लागू गर्ने योजना छ ।

ईईएस प्रणाली अक्टोबर १२ देखि क्रमिक रूपमा लागू गर्न थालिएको थियो, तर प्राविधिक समस्याका कारण सबै स्थानमा अझै पूर्ण रूपमा सञ्चालनमा आइसकेको छैन । 

यसको मुख्य उद्देश्य बेलायत लगायत ईयू बाहिरका यात्रुहरूको प्रवेश र बाहिरिने समय डिजिटल रूपमा रेकर्ड गर्नु हो । यसले परम्परागत पासपोर्टमा छाप लगाउने प्रणालीलाई प्रतिस्थापन गर्नेछ । यस प्रणालीका कारण केही युरोपेली विमानस्थलहरूमा लामो लाइन लागेको छ। विशेष गरी व्यस्त छुट्टी अवधिमा झन् ढिलाइ हुने चेतावनी दिइएको छ ।

जिनेभाजस्ता लोकप्रिय गन्तव्यहरूमा यात्रुहरूले घण्टौँ कुर्नुपरेको अनुभव गरिसकेका छन् । यात्रा विज्ञहरूका अनुसार कतिपय स्थानमा आईटीसम्बन्धी समस्या देखिँदा यो प्रणाली सहज रूपमा प्रयोग गर्न सकिएको छैन, जसका कारण यात्रुहरूलाई थप सास्ती भएको छ । यद्यपि यूरोपेली आयोगले भीड व्यवस्थापन गर्न आवश्यक परे अस्थायी रूपमा जाँच प्रक्रिया स्थगित गर्न सकिने जनाएको छ ।

शुक्रबारदेखि सबै विमानस्थलमा एकै पटक यो प्रणाली लागू नहुने पनि स्पष्ट पारिएको छ । मिलान र लिस्बनका विमानस्थलहरूले तत्काल यो प्रणाली पूर्ण रूपमा लागू नगर्ने बताएका छन् । नयाँ व्यवस्था लागू भएसँगै युरोप भ्रमण गर्ने यात्रुहरूले थप समय र प्रक्रियाका लागि तयारी गर्नुपर्ने देखिएको छ।