अमेरिकाले आफ्नो देशको हितविरुद्ध काम गर्ने शक्तिलाई सहयोग गर्ने व्यक्तिहरूमाथि भिसा प्रतिबन्ध लगाउने नयाँ नीति घोषणा गरेको छ । बिहीबार विदेश मन्त्रालयले सार्वजनिक गरेको वक्तव्यमा यस नीतिअन्तर्गत हालसम्म २६ जनाको भिसा रद्द गरिसकिएको जानकारी दिइएको छ । 

यो कदम अमेरिकी राष्ट्रपति डोनाल्ड ट्रम्पको पश्चिमी गोलार्द्धमा प्रभाव विस्तार गर्ने रणनीतिसँग जोडिएको मानिएको छ । ट्रम्पले आफ्नो यस दृष्टिकोणलाई “डोनोरो डक्ट्रिन” नाम दिएका छन्, जुन ऐतिहासिक मुनरो डक्ट्रिनबाट प्रेरित अवधारणा हो । 

मन्त्रालयका अनुसार नयाँ प्रतिबन्धले त्यस्ता व्यक्तिहरूलाई लक्षित गर्नेछ, जसले अमेरिकाका विपक्षी शक्तिहरूलाई सहयोग, वित्तीय समर्थन वा निर्देशन दिने कार्यमा संलग्न छन् । यस्ता गतिविधिमा रणनीतिक स्रोतहरूमा बाह्य शक्तिको पहुँच बढाउने, क्षेत्रीय सुरक्षालाई कमजोर बनाउने तथा अमेरिकी आर्थिक हितमा असर पुर्‍याउने कार्यहरू समावेश हुने बताइएको छ ।

सरकारी वक्तव्यमा भने कुनै विशेष देश वा समूहको नाम उल्लेख गरिएको छैन । तर यो नीति विशेष गरी चीनको बढ्दो प्रभावलाई लक्षित गरिएको हुन सक्ने अनुमान गरिएको छ । 

पछिल्ला वर्षहरूमा ल्याटिन अमेरिकी देशहरूसँग चीनको सम्बन्ध विस्तार हुँदै गएको छ । ट्रम्प प्रशासनले दोस्रो कार्यकाल सुरु गरेयता लागूऔषध तस्करी नियन्त्रण गर्न कडा नीति अपनाउँदै आएको छ र आवश्यक परे आर्थिक प्रतिबन्ध तथा सैन्य कारबाहीसमेत गर्न सक्ने चेतावनी दिएको छ । 

यस नीतिलाई लिएर आलोचना पनि भइरहेको छ । आलोचकहरूले यसलाई विदेशी नागरिक तथा राजनीतिक विरोधीमाथि दबाब सिर्जना गर्ने माध्यमका रूपमा प्रयोग गरिएको आरोप लगाएका छन् । गत वर्ष पनि ट्रम्प प्रशासनले प्रो–प्यालेस्टाइन प्रदर्शनकारीहरूको भिसा रद्द गर्ने प्रयास गरेको थियो ।