नेपालको पर्यटन प्रवर्द्धन गर्ने उद्देश्यका साथ भारतस्थित नेपाली दूतावासले भारतीय सामाजिक सञ्जाल प्रवर्द्धक (इन्फ्लुएन्सर, भ्लगर र पडकास्टर) हरूलाई नेपाल भ्रमण गराउने भएको छ । 

नेपाली दूतावासले आज एक सूचना जारी गर्दै यस भ्रमणमा सहभागी हुन इच्छुक भारतीय सामाजिक सञ्जाल प्रयोगकर्तालाई आवेदन दिन आह्वान गरेको छ । विशेष ‘परिचयात्मक भ्रमण’ नाम दिएको सो कार्यक्रमका लागि पाँच जना सामाजिक सञ्जालमार्फत डिजिटल सामग्री उत्पादन गर्नेहरूलाई नेपाल भ्रमण गराउने भनेको छ ।  

नेपालको प्राकृतिक सौन्दर्य, सांस्कृतिक सम्पदा, आध्यात्मिक स्थलहरू, आतिथ्य सत्कार र विविध पर्यटकीय क्षेत्रहरूको अनुभव तथा प्रवर्द्धनका लागि दूतावासले उत्कृष्ट पाँच जना भारतीय सामाजिक सञ्जाल प्रयोगकर्तालाई छनोट गर्ने दूतावासले जनाएको छ । यस भ्रमणबाट उत्पादित डिजिटल सामग्रीले भारतीय पर्यटकहरूलाई अवकाश, तीर्थयात्रा, संस्कृति, साहसिक कार्य र पारिवारिक भ्रमणका लागि नेपाल आउन प्रोत्साहन गर्ने विश्वास लिइएको दूतावासले जनाएको छ ।  नेपाललाई भारतीय पर्यटकहरूका लागि एक नजिकको, सुलभ र स्वागतयोग्य गन्तव्यका रूपमा प्रवर्द्धन गर्ने, हिमाल, ताल, सम्पदा स्थल, मन्दिर, स्तूप, चाडपर्व, परिकार र स्थानीय संस्कृतिलाई उजागर गर्ने, आध्यात्मिक गन्तव्यहरूलाई विशेष रूपमा प्रस्तुत गर्ने जस्ता उद्देश्य यो भ्रमणको राखिएको छ । 

सामाजिक प्रयोगकर्ता भारतीय नागरिक वा भारतमा रहेर डिजिटल सामग्री उत्पादन गर्ने हुनुपर्छ ।  युट्युब, इन्स्टाग्राम, फेसबुक, एक्स (ट्विटर) वा अन्य डिजिटल प्लेटफर्महरूमा उनको सक्रिय उपस्थिति भएको हुनुपर्ने मापदण्ड राखिएको छ । यात्रा, संस्कृति, आध्यात्मिकता, जीवनशैली, साहसिक कार्य, स्वास्थ्य (वेलनेस), खाना, सम्पदा वा पर्यटनसँग सम्बन्धित सामग्री बनाउने गरेको हुनुपर्ने भनिएको छ ।  विशेष गरी भारतीय पर्यटकहरूमाझ उनको बलियो उपस्थिति र सक्रिय दर्शकहरु हुनुपर्ने, उच्च गुणस्तरका भिडियो, रील्स, पोस्ट, स्टोरिज वा भ्लगहरू बनाउन सक्षम हुनुपर्ने भनिएको छ ।  छनोट भएका सहभागीहरूले आफ्नो नेपाल अनुभवका आधारमा ट्राभल भ्लग, रील्स, शट्र्स, स्टोरिज, पडकास्ट वा पोस्टहरू तयार गरी प्रकाशन गर्नुपर्ने हुन्छ ।