मार्च महिनामा लस एन्जलसको सार्वजनिक यातायात प्रणालीमा भएको साइबर आक्रमणमा इरानी ह्याकरहरूको संलग्नता रहेको पाइएको इजरायली साइबर सुरक्षा अनुसन्धानकर्ताहरूले दाबी गरेका छन् ।

उक्त आक्रमणका कारण लस एन्जलस काउन्टीको महानगरीय यातायात प्राधिकरणले आफ्नो नेटवर्कका केही भाग बन्द गर्नुपरेको थियो । ग्याम्बिट सेक्युरिटी नामक तेल अभिभस्थित साइबर सुरक्षा कम्पनीका अनुसार सो घटनामा ह्याकरहरूले कम्तीमा ७०० गिगाबाइट बराबरको इमेल, ब्याकअप र अन्य फाइलहरू चोरी गरेका थिए ।

कम्पनीका अनुसार ती डाटा अनलाइनमा गल्तीवश सार्वजनिक भएपछि अनुसन्धान गर्दा आक्रमणको डिजिटल प्रमाण पहिले नै इरानसँग जोडिएको ह्याकिङ अभियानसँग मेल खाएको पाइएको हो ।

इरान समर्थक ‘अबाबिल अफ मिनाब’ नामक समूहले यस आक्रमणको जिम्मेवारी लिएको थियो । समूहको नाम इरानको मिनाब सहरमा एउटा विद्यालय १७५ जना छात्राको ज्यान जाने गरी भएको बम विस्फोटसँग सम्बन्धित रहेको बताइएको छ ।

अमेरिकी र इजरायली अनुसन्धानकर्ताहरूले यस्ता समूहहरूलाई इरानी साइबर गुप्तचर निकायसँग सम्बन्धित ‘कट–आउट’ सङ्गठन हुनसक्ने आरोप लगाउँदै आएका छन् । सो घटनाका ह्याकरहरूको इरानसँग सम्बन्ध रहेको आशङ्का पहिलेदेखि नै भए पनि अहिलेको अनुसन्धानले त्यसलाई समर्थन गर्ने फरेन्सिक प्रमाण उपलब्ध गराएको ग्याम्बिटका निर्देशक इयाल सेलाले बताएका छन् ।

लस एन्जलस काउन्टीको महानगरीय यातायात प्राधिकरण चाहिँ घटनाको अनुसन्धान जारी रहेकाले आक्रमणको स्रोतबारे अनुमान नगर्ने जनाएको छ । अमेरिकी सङ्घीय अनुसन्धान ब्युरो सङ्घीय अनुसन्धान ब्युरो (एफबीआई) ले पनि घटनाबारे जानकारी रहेको र सम्बन्धित निकायहरूसँग समन्वय गरिरहेको बताएको छ । 

मार्च १६ तिर पत्ता लागेको उक्त साइबर आक्रमणपछि रेल वा बस सेवा प्रत्यक्ष रूपमा अवरुद्ध नभए पनि यात्रु सूचना स्क्रिनहरू बन्द भएका थिए र ट्रान्जिट कार्डमा रकम जम्मा गर्ने प्रणाली प्रभावित भएको थियो ।