अमेरिकाको वासिङ्टन राज्यस्थित एक कागज उद्योगमा भएको घातक रासायनिक ट्याङ्की विस्फोटपछि हराइरहेका ९ जनाको खोजी कार्य पुनः सुरु गरिएको छ । अधिकारीहरूले उनीहरू मृत भएको आशङ्का गरेका छन् ।

मङ्गलवार बिहान निप्पोन डायनावेभ प्याकेजिङ कम्पनीको लङभ्यूस्थित कारखानामा ९ लाख ग्यालन क्षमताको रासायनिक ट्याङ्की फुट्दा कम्तीमा दुई जनाको मृत्यु पुष्टि भएको थियो भने अन्य ८ जना घाइते भएका थिए ।

घटनापछि ट्याङ्कीभित्र रहेको खतरनाक रसायन बाहिर फैलिँदा कोलम्बिया नदीमा प्रदूषण पुगेको अधिकारीहरूले बताएका छन् । उक्त नदीलाई अमेरिकाको प्रशान्त उत्तर पश्चिम क्षेत्रको जीवनरेखा मानिन्छ । ट्याङ्कीमा कागज उत्पादन प्रक्रियामा प्रयोग गर्ने ‘ह्वाइट लिकर’ नामक रसायन थियो । यो पदार्थ छालामा परे दोस्रो र तेस्रो तहसम्म जलन गराउन सक्ने बताइएको छ । यसको बाक्लो बाफ सासमार्फत शरीरमा गए खतरनाक हुनसक्ने अधिकारीहरूले बताएका छन् ।

प्रहरी र दमकल अधिकारीहरूका अनुसार ट्याङ्की अहिले स्थिर अवस्थामा पुगेको छ र थप विस्फोटको जोखिम कम भएकाले खोजी अभियान पुनः सुरु गरिएको हो । लङभ्यू फायर विभागका अधिकारी म्याट आमोसका अनुसार अब अभियान सुस्तरी, व्यवस्थित र सावधानीपूर्वक अघि बढाइनेछ ।  

हराइरहेका व्यक्तिहरू भेटिएपछि शव परीक्षणका लागि सम्बन्धित कार्यालयमा पठाइनेछ । घटनामा ज्यान गुमाउनेमध्ये गिल्बर्ट बर्नाल नामका एक व्यक्तिको परिवारले पहिचान गरेको छ । उनकी छोरी जियोभाना बर्नाल–फर्गुसनका अनुसार अस्पतालमा रहेको शव फोटोमार्फत परिवारले पहिचान गरेको हो, यद्यपि औपचारिक पुष्टि अझै बाँकी छ ।