युक्रेनका विभिन्न भागमा भएको रुसी क्षेप्यास्त्र र ड्रोन आक्रमणमा मृत्यु हुनेको संख्या १२ जना पुगेको छ । 

यी घटनामा अरू दर्जनौँ घाइते भएका छन् ।  युक्रेनी अधिकारीहरूले यो आक्रमणलाई हालसम्मकै ठुलो हवाई आक्रमणमध्ये एक बताएका छन् । रुसले रातभरमा ६५६ ड्रोन र ७३ क्षेप्यास्त्र प्रहार गरेको युक्रेनी हवाई बलले जनाएको छ । 

राजधानी किभका मेयर भिटाली क्लिट्स्कोका अनुसार राजधानीमै कम्तीमा ४ जनाको मृत्यु भएको छ र ५८ जना घाइते भएका छन्, जसमा दुई बालबालिका पनि छन् ।

उनले नागरिकहरूलाई सुरक्षित स्थानमा बस्न आग्रह गर्दै भने, ‘सहरमा विस्फोट भइरहेका छन् । हवाई प्रतिरक्षा सक्रिय छ, कृपया आश्रयमा बस्नुहोस्,’ । मध्य युक्रेनको द्निप्रोपेत्रोभ्स्क क्षेत्रमा थप ८ जनाको मृत्यु भएको छ र ३६ भन्दा बढी घाइते भएका छन् । 

त्यसैगरी उत्तर–पूर्वी सहर खार्किभमा पनि १० जना घाइते भएको स्थानीय अधिकारीहरूले जनाएका छन् । रुसको रक्षा मन्त्रालयले भने आक्रमणलाई युक्रेनको सैन्य–औद्योगिक संरचना लक्षित सटीक हतियार प्रयोग गरिएको ठुलो हमला भएको दाबी गरेको छ । उनीहरूका अनुसार किभसहित विभिन्न क्षेत्रका ऊर्जा र यातायात पूर्वाधारलाई निशाना बनाइएको थियो ।

यसैबीच रुसको सीमावर्ती क्षेत्र कुस्र्क ओब्लास्टमा युक्रेनी ड्रोन आक्रमणमा एक जनाको मृत्यु भएको रूसी अधिकारीहरूले बताएका छन् । 

साथै दक्षिण–पश्चिमी सहर क्रास्नोडारमा रहेको तेल प्रशोधन केन्द्रमा ड्रोन आक्रमणपछि आगलागी भएको छ । युक्रेनी राष्ट्रपति भोलोदिमिर जेलेन्स्कीले यसअघि नै रुसले ठुलो मात्रामा आक्रमण गर्ने तयारी गरिरहेको गुप्तचर जानकारी रहेको चेतावनी दिएका थिए । उनले नागरिकहरूलाई हवाई चेतावनीलाई गम्भीरतापूर्वक लिन आग्रह गरेका थिए ।