इजरायल र हिजबुल्लाहबिच युद्धविराम सम्झौता घोषणा भएको केही घण्टामै दुवै पक्षले एकअर्कामाथि आक्रमण गरेको खबर सार्वजनिक भएको छ ।

लेबनानको सरकारी समाचार संस्था नेसनल न्युज एजेन्सी (एनएनए) का अनुसार बिहीबार बिहान इजरायलले दक्षिणी लेबनानका कफर तेब्नित र टायर क्षेत्रमा ड्रोन आक्रमण गरेको छ । यता इरान समर्थित हिजबुल्लाहले दक्षिणी लेबनानको बोफोर्ट किल्ला नजिक रहेको इजरायली सैन्य कमान्ड पोस्टलाई निशाना बनाएको जनाएको छ । उक्त रणनीतिक क्षेत्र इजरायली सेनाले गत सप्ताहान्त कब्जामा लिएको थियो ।

इजरायली सेनाका अरबी भाषाका प्रवक्ता अभिचाय अद्राइले बिहीबार बिहान दक्षिणी लेबनानका बासिन्दालाई नयाँ चेतावनी जारी गर्दै इजरायलले हिजबुल्लाहका संरचना तथा पूर्वाधारहरूलाई लक्षित कारबाही जारी राख्ने बताएका छन् । उनले विशेषगरी जहरानी नदीको दक्षिणी क्षेत्र आसपासका हिजबुल्लाहसँग सम्बन्धित स्थानहरूमा सैन्य कारबाही जारी रहने बताएका छन् ।

यसअघि इजरायली रक्षा बल (आईडीएफ)ले उत्तरी इजरायलस्थित कफर युवाल क्षेत्रमा एक ‘शत्रुतापूर्ण हवाई साधन’ प्रवेश गरेको पत्ता लागेको जनाएको थियो । उक्त क्षेत्र लेबनान सीमासँग नजिक पर्छ ।

बुधबार भएको युद्धविराम सम्झौताअनुसार हिजबुल्लाहले सम्पूर्ण रकेट तथा सैन्य आक्रमण रोक्नुपर्नेछ भने दक्षिणी लेबनानबाट आफ्ना सबै लडाकु तथा सैन्य संरचना हटाउनुपर्नेछ । यसको बदलामा इजरायलले पनि सैन्य कारबाही रोक्ने प्रतिबद्धता जनाएको छ ।