अमेरिकाको रक्षा मन्त्रालय (पेन्टागन)ले इजरायलबाट बढ्दो जासुसी जोखिमबारे चिन्ता व्यक्त गरेको छ।

अमेरिकी सञ्चारमाध्यम द न्यूयोर्क टाइम्सका अनुसार अमेरिकी गुप्तचर प्रतिवेदनहरूले इजरायली गुप्तचर निकायहरूले इरानसँग शान्ति सम्झौताका लागि काम गरिरहेका अमेरिकी वार्ताकारहरूको निगरानी गरिरहेको हुन सक्ने आशङ्का गरेका छन्। 

प्रतिवेदनमा अमेरिका र इजरायलले लामो समयदेखि एकअर्कामाथि जासुसी गतिविधि सञ्चालन गर्दै आएको र दुवै पक्षले त्यसलाई कुनै हदसम्म स्वीकार गर्दै आएको उल्लेख छ। 

तर केही अमेरिकी अधिकारीहरूका अनुसार इरानसँगको वार्तामा अमेरिकी धारणा र रणनीति थाहा पाउन इजरायलले पछिल्लो समय बढाएको प्रयासले स्वीकार्य सीमारेखा पार गरेको छ।

अमेरिकी गुप्तचर प्रतिवेदनहरूले राष्ट्रपति डोनाल्ड ट्रम्पका प्रमुख वार्ताकार स्टिभ विटकफ, पेन्टागनका नीति प्रमुख एल्ब्रिज ए. कोल्बी तथा उनका प्रमुख सहायक माइकल पी. डिमिनो चतुर्थमाथि निगरानी बढाइएको हुन सक्ने चिन्ता व्यक्त गरेका छन्।

यसैबिच डिफेन्स इन्टेलिजेन्स एजेन्सी र अन्य सैन्य गुप्तचर कार्यालयहरूले तयार पारेको अर्को प्रतिवेदनमा इजरायलबाट उत्पन्न प्रतिजासुसी (काउन्टर–इन्टेलिजेन्स) जोखिमको स्तर पछिल्ला साताहरूमा उच्च बाट बढाएर गम्भीर मा पुर्‍याएको छ । यो भनेको सबैभन्दा माथिल्लो तहमा हो।

प्रतिवेदनमा इजरायलले इरानसँगको अमेरिकी वार्ताको प्रगति, सम्भावित सम्झौता तथा अमेरिकी रणनीतिबारे थप जानकारी प्राप्त गर्न सक्रिय प्रयास गरिरहेको हुन सक्ने आशङ्का व्यक्त गरिएको छ।

यद्यपि अमेरिकी र इजरायली सरकारहरूले यस विषयमा सार्वजनिक रूपमा कुनै आधिकारिक प्रतिक्रिया दिएका छैनन्।