अमेरिका र इरानबीच आगामी शुक्रबार हुने भनिएको सम्झौतापछि विदेशमा रोक्का गरिएका अर्बौं डलर बराबरका इरानी सम्पत्ति तुरुन्तै उपलब्ध गराइने इरानी दाबीलाई अमेरिकी पक्षले अस्वीकार गरेको छ।

एक अमेरिकी अधिकारीले प्रतिक्रिया दिँदै भने, “यो पूर्ण रूपमा गलत हो। यो कार्यसम्पादनमा आधारित सम्झौता हो, र इरानले आफ्ना प्रतिबद्धताहरू कार्यान्वयन नगरेसम्म कुनै पनि रोक्का गरिएको रकम फुकुवा गरिने छैन।”

अमेरिकी प्रतिक्रिया इरानका उपविदेशमन्त्री काजेम घरिबाबादीको अभिव्यक्तिपछि आएको हो। घरिबाबादीले सम्झौतापछिको ६० दिने वार्ताको अर्को चरण अघि बढ्नुअघि वासिङ्टनले केही दायित्व पूरा गर्नुपर्ने बताएका थिए। उनका अनुसार ती दायित्वमा विदेशमा रोक्का गरिएका इरानी सम्पत्ति तथा रकम फुकुवा गर्ने विषय पनि समावेश छ।

दुवै पक्षका फरक–फरक भनाइले सम्झौतापछिको कार्यान्वयन प्रक्रियाबारे अझै स्पष्ट सहमति नबनेको संकेत गरेका छन्। इरानले वार्ता अगाडि बढ्नुअघि आर्थिक प्रतिबन्धमा राहत र रोक्का गरिएका सम्पत्तिमा पहुँच चाहेको देखिन्छ भने अमेरिकाले इरानले पहिले आफ्ना प्रतिबद्धता पूरा गर्नुपर्ने अडान दोहोर्‍याएको छ।