मेसेजिङ एप टेलिग्रामले भारतमा आफूविरुद्ध लगाइएको अस्थायी प्रतिबन्धविरुद्ध अदालतमा मुद्दा दायर गरेको छ । भारतमा लाखौँ विद्यार्थी सहभागी हुने मेडिकल प्रवेश परीक्षा नेसनल एलिजिबिलिटी–कम–इन्ट्रान्स टेस्ट (निट)  फेरि सञ्चालन हुनुअघि भारत सरकारले एपमाथि प्रतिबन्धको घोषणा गरेको थियो ।

बुधबार टेलिग्रामले भारत सरकारको निर्णयलाई चुनौती दिएको हो । एक दिनअघि अधिकारीहरूले निट परीक्षाको प्रश्नपत्र लिक भएको आशंकामा उक्त एपमा पहुँच रोक्ने निर्णय गरेका थिए ।

आगामी आइतबार हुने पुनः परीक्षाको निष्पक्षता जोगाउन यो कदम आवश्यक भएको सरकारको दाबी छ । गत महिनाको परीक्षा प्रश्न पत्र लिक भएको आरोपपछि रद्द गरिएको थियो । तर टेलिग्रामका प्रमुख कार्यकारी अधिकृत पावेल दुरोभले यो प्रतिबन्धलाई गल्ती भन्दै आलोचना गरेका छन् । उनका अनुसार  यस्तो कदमले वास्तविक दोषीलाई रोक्न धेरै सहयोग गर्नेछैन, बरु उल्टै लाखौँ प्रयोगकर्तालाई असर गर्नेछ ।

कम्पनीका वकिलहरूले बुधबार दिल्ली उच्च अदालतमा मुद्दा उठाएको भारतीय कानुनी वेबसाइट लाइभ लले जनाएको छ । अदालतले मुद्दा सोही दिन सुनुवाइ गर्ने जनाएको छ । यसअघि दुरोभले सामाजिक सञ्जाल एक्स मा पोस्ट गर्दै टेलिग्रामले भारतमा परीक्षासम्बन्धी अवैध सामग्री फैलाउने सयौँ च्यानल हटाइसकेको बताएका थिए । प्रतिबन्धले समस्या समाधान नगर्ने दाबी पनि उनले गरेका थिए । निट चिकित्सा अध्ययनका लागि सबैभन्दा ठूलो प्रवेश परीक्षा हो, जसमा लाखौँ विद्यार्थी सहभागी हुन्छन् ।