विभिन्न मुलुकका नेताहरूबिच औपचारिक छलफल तथा भेटवार्ताका विषय स्वाभाविक रूपमा समाचार बन्छन् नै । जी–७ सम्मेलनमा सहभागी नेताहरूबिच भएको अनौपचारिक कुराकानी पनि समाचारका रूपमा सार्वजनिक भएको छ ।

सम्मेलनमा सहभागी नेताहरूबिच अनौपचारिक छलफलका क्रममा भएका कुरा माइक्रोफोनका माध्यमबाट रेकर्ड भएको हो, जसमा नेताहरूले व्यक्तिगत जीवन, रुचि, मनमा लागेका कुरा व्यक्त गरेका छन् ।

उक्त अनौपचारिक छलफलमा इटलीकी प्रधानमन्त्री जर्जिया मेलोनीले तीन कप कफी पिएर आएको सुनाएकी थिइन् । उनले निन्द्रा भगाउन आफूले कफी पिएको बताएकी थिइन् ।

यस क्रममा मेलोनीले धुम्रपान एक महिनादेखि त्यागेको पनि बताइन् । उनले धुम्रपान त्यागेको बताएपछि क्यानाडा, ब्रिटेन, जापान र युरोपेली संघका नेताले बधाई दिएका थिए ।

त्यसपछि क्यानाडाका प्रधानमन्त्री मार्क क्रेनेले इटालियन कमकक्षी मेलोनीलाई उनको हाततिर इशारा गर्दै ‘निकोटिन प्याच’ लगाएको हो ? भनेर सोधेका थिए । निकोटिन प्याच छालामा लगाइन्छ, जसले शरीरलाई केही मात्रामा निकोटिन उपलब्ध गराउँछ, जसले गर्दा धुम्रपानको लत त्याग्न मद्दत गर्दछ ।

यस्तै फ्रान्सका राष्ट्रपति इमानुएल माक्रोंले विश्वकप फुटबलबारे चर्चा गरेका थिए । उनले आफ्नो राष्ट्रिय फुटबल टोलीको प्रशंसासमेत गरेका थिए । ब्रिटेनका प्रधानमन्त्री किर स्टार्मरले भने स्पेन र केप भर्डेबिच भएको गोलरहित बराबरीको चर्चा गरेका थिए । उनले सो म्याच आश्चर्यचकित रहेको जिकिर गरे ।

यस्तै, जर्मन चान्सलर फ्रेड्रिच मर्जले अमेरिकी राष्ट्रपति डोनाल्ड ट्रम्पलाई आफ्नो राष्ट्रिय फुटबल टिमको जर्सी उपचार दिएका थिए । ४७ नम्बरको उक्त जर्सीमा ट्रम्पको नाम उल्लेख थियो । ट्रम्प अमेरिकाको ४७ औँ राष्ट्रपति रहेकाले उनलाई ४७ नम्बरको जर्सी दिइएको हो ।

सम्मेलनमा क्रममा फ्रान्सका राष्ट्रपति माक्रोंले आफ्नो घडी कतै छाडेका थिए । जब दिवाभोजका लागि नेताहरू जम्मा भए, क्यानाडाका प्रधानमन्त्री कार्नीले माक्रोंलाई ‘तपाईंले आफ्नो घडी छाड्नुभएछ, यहाँ छ’ भनेर देखाए ।’ लगत्तै अमेरिकी राष्ट्रपति ट्रम्पले ‘उसो भए मलाई दिनुस्’ भनेका थिए । ट्रम्पको कुरा सुनेर अन्य नेता हाँसेका थिए ।