अमेरिका र इरानबिच भएको सम्झौतापछि इरानले आफ्नो तेल निर्यात पुनः विस्तार गरेको छ ।

इरानले कम्तीमा ५० लाख ब्यारेल कच्चा तेल समुद्रमार्फत पठाइसकेको एक विश्लेषण संस्थाले जनाएको छ । ऊर्जा बजार विश्लेषण गर्ने संस्था केप्लरका अनुसार इरानको झण्डा बोकेका कम्तीमा तीन वटा तेल ट्यांकरले कुल करिब ५० लाख ब्यारेल तेल बोकेर समुद्र यात्रा सुरु गरेका छन् । यी जहाजहरू हालै अमेरिका–इरान सम्झौतापछि आफ्नो बन्दरगाह अवरोध हटाइएपछि प्रस्थान गरेका हुन् ।

संस्थाका अनुसार ती ट्यांकरहरू ओमानको खाडी र अरब सागरबिच पर्ने अमेरिकी नौसैनिक निगरानी सीमारेखा पार गरिसकेका छन् । तर ती कुनै पनि जहाजले स्ट्रेट अफ होर्मुज हुँदै यात्रा नगरेको बताइएको छ । केप्लरका अनुसार थप एक ट्यांकर करिब २० लाख ब्यारेल तेल बोकेर सोही सीमा नजिक पुगिरहेको देखिएको छ ।

इरानी–सम्बन्धित केही जहाजहरूले आफ्नो स्थान बन्द राखेर यात्रा गरिरहेको हुन सक्ने भन्दै वास्तविक निर्यातको मात्रा अझ बढी हुन सक्ने चेतावनी केप्लरले दिएको छ ।

‘यी तथ्यांक न्यूनतम देखिने गतिविधि मात्र हुन्, सम्पूर्ण निर्यातको पूर्ण चित्र होइन,’ केप्लरले जनाएको छ । अमेरिकी ऊर्जा सूचना प्रशासन ईआईएका अनुसार इरानको सरकारी राजस्वको करिब ५० प्रतिशत हिस्सा तेल बिक्रीबाट आउने गर्छ ।

सम्झौताअघि इरानले दैनिक करिब २२ लाख ५० हजार ब्यारेलसम्म तेल निर्यात गर्दै आएको अनुमान गरिएको थियो ।