भारतमा १३ अर्ब डलर थप लगानी गर्ने अमेजनको घोषणा

बहुराष्ट्रिय इ–कमर्श तथा प्रविधि कम्पनी अमेजनले भारतमा थप १३ अर्ब अमेरिकी डलर लगानी गर्ने घोषणा गरेको छ । कम्पनीका प्रमुख कार्यकारी अधिकृत (सीईओ) एन्डी जेसीले भारतीय प्रधानमन्त्री नरेन्द्र मोदीसँगको भेटपछि उक्त घोषणा गरेका हुन् । यस नयाँ प्रतिबद्धतासँगै भारतमा अमेजनको कुल घोषित लगानी ४८ अर्ब अमेरिकी डलर पुगेको छ ।

कम्पनीका अनुसार नयाँ लगानी मुख्य रूपमा कृत्रिम बौद्धिकता (एआई) र क्लाउड कम्प्युटिङ पूर्वाधार विस्तारमा केन्द्रित हुनेछ । कुल ४८ अर्ब डलरमध्ये करिब २१ अर्ब डलर एआई तथा अमेजन वेब सर्भिससम्बन्धी पूर्वाधार विकासमा खर्च गरिनेछ । 

यसबाट विशेष गरी मुम्बई र हैदराबादले लाभ पाउने अपेक्षा गरिएको छ । अमेजनले ती सहरहरूमा अत्याधुनिक डाटा सेन्टर र टेक्नोलोजी हब विस्तार गरिरहेको छ ।

अमेजनले भारतलाई आफ्नो सबैभन्दा महत्त्वपूर्ण र तीव्र गतिमा विस्तार भइरहेको बजारमध्ये एक मानेको छ । कम्पनीका अनुसार सन २०१० देखि २०३० सम्मको अवधिमा भारतमा अमेजनको कुल सञ्चित लगानी ८८ अर्ब अमेरिकी डलरभन्दा बढी पुग्नेछ। यस विशाल लगानीले भारतको डिजिटल पूर्वाधारलाई थप मजबुत बनाउने  अनि प्रत्यक्ष र अप्रत्यक्ष रूपमा लाखौं नयाँ रोजगारी सिर्जना हुने बताइएको छ।