अमेरिका र इरानबिच भएको अन्तरिम शान्ति सम्झौताले संयुक्त राष्ट्रसंघीय निरीक्षकहरूलाई इरानका आणविक स्थलहरूमा पहुँच दिने व्यवस्था गरेको अन्तर्राष्ट्रिय आणविक ऊर्जा एजेन्सी (आईएईए) का प्रमुखले शुक्रबार बताएका छन् । आईएईएका प्रमुख राफेल ग्रोसीले जापानमा आयोजित पत्रकार सम्मेलनमा बोल्दै भने– ‘हामीलाई निगरानी गर्न निरीक्षण आवश्यक छ, अरू कुनै विकल्प छैन ।’ 

उनका अनुसार अमेरिका र इरानबिच हालै भएको अस्थायी सम्झौतामा इरानको आणविक कार्यक्रम आईएईएद्वारा निगरानी गरिने स्पष्ट उल्लेख छ । जसका लागि स्थल निरीक्षण अनिवार्य हुन्छ ।

अमेरिकी राष्ट्रपति डोनाल्ड ट्रम्पले इरानले आणविक निरीक्षण अनुमति दिएको बताएका छन् । तर इरानले भने यस्ता दाबी अस्वीकार गर्दै संयुक्त राष्ट्रसङ्घीय निरीक्षकहरूलाई नयाँ भ्रमण अनुमति दिने कुनै ठोस योजना नभएको जनाएको छ । ग्रोसीले दुवै पक्षका फरक दाबीबारे टिप्पणी गर्दै यहाँ वाक युद्धजस्तो अवस्था रहेको भन्दै स्थिति अझै स्पष्ट नभएको सङ्केत गरे ।