दक्षिण अफ्रिकाका सबैभन्दा वरिष्ठ प्रहरी अधिकारीहरूमध्ये एक, निलम्बित डेपुटी क्राइम इन्टेलिजेन्स प्रमुख मेजर जनरल फिरोज खान आक्रमणबाट बच्न सफल भएका छन्।

जोहानेसबर्गमा आइतबार साँझ घरतर्फ गाडी चलाएर जाँदै गरेको अवस्थामा उनीमाथि गोली प्रहार भएको थियो। गोली लागेर घाइते भएका खानलाई आकस्मिक शल्यक्रियाका लागि तत्काल अस्पताल पुर्‍याइएको स्थानीय सञ्चारमाध्यमहरूले जनाएका छन्।

दक्षिण अफ्रिकाको प्रहरी सङ्गठनभित्र रहेको आपराधिक गतिविधिबारे छानबिन गर्न गठित सार्वजनिक आयोगमा खानले बयान दिनु भन्दा केही दिन अगाडि मात्रै यो आक्रमण भएको हो। दक्षिण अफ्रिकी प्रहरीका प्रवक्ता ब्रिगेडियर एथलेन्डा माथेले सोमबार एक विज्ञप्ति जारी गर्दै प्रहरीले खानमाथि भएको गोली प्रहारको घटनाबारे अनुसन्धान गरिरहेको बताएकी छन्। उनले भनिन्, ‘कुनै पनि सम्भावित उद्देश्यबारे अनुमान लगाउनु वा यो घटना आयोगमा उनको आगामी उपस्थितिसँग जोडिएको निष्कर्ष निकाल्नु अपरिपक्व र गैरजिम्मेवारपूर्ण हुनेछ।’

‘मादलाङ्गा आयोग’ का नामले चिनिने उक्त छानबिन समिति वरिष्ठ प्रहरी अधिकारी लेफ्टिनेन्ट जनरल न्ह्लान्ह्ला मख्वानाजीले गत जुलाईमा सङ्गठित आपराधिक समूहहरूले सरकारमा घुसपैठ गरेको आरोप लगाएपछि गठन गरिएको थियो। सन् २०२१ मा जोहानेसबर्गमा भएको एउटा असफल ड्रग अपरेसनका सन्दर्भमा खानको नाम पटक-पटक जोडिएपछि उनलाई आयोगमा बयानका लागि बोलाइएको थियो। 

स्थानीय अनलाइन पत्रिका ‘डेली माभ्रिक’ का अनुसार खानसँग फायरब्रान्ड राजनीतिज्ञ जुलियस मलेमा र राजनीतिक फिक्सर ब्राउन मोगोत्सीसँगको कथित सम्बन्धबारे सोधपुछ गर्ने तयारी थियो। खान यसअघि नै अर्का एक वरिष्ठ प्रहरी अधिकारी र एक व्यवसायीसँगै गत मे महिनामा अवैध सुन कारोबारको आरोपमा पक्राउ परेका थिए। 

सन् २०२१ मा जोहानेसबर्गको ओआर टाम्बो अन्तर्राष्ट्रिय विमानस्थलमा एक व्यवसायी ७५.९ ग्राम प्रशोधन नगरिएको सुनसहित फेला परेका थिए। सोधपुछका क्रममा ती व्यवसायीले आफू वरिष्ठ प्रहरी अधिकारीहरूको गुप्तचर एजेन्टका रूपमा काम गरिरहेको दाबी गरेका थिए। 

तर अनुसन्धानकर्ताहरूले त्यस समयमा बहुमूल्य धातुसँग सम्बन्धित कुनै पनि आधिकारिक गुप्तचर अपरेशन सञ्चालनमा नरहेको फेला पारे। खान र अर्का एक अधिकारीले मातहतका प्रहरीहरूलाई ती व्यवसायीलाई छोड्न निर्देशन दिएको अभियोजकहरूले गत मे महिनामा बताएका थिए। 

यस आरोपबारे खानले हालसम्म कुनै टिप्पणी गरेका छैनन् भने उनी धरौटीमा रिहा भइसकेका थिए।