अरब सागरमा अमेरिकी नौसेनाको हेलिकोप्टर आकस्मिक अवतरण, एक चालक दल सदस्य बेपत्ता

अमेरिकी नौसेनाको एमएच–६०एस सी हक हेलिकोप्टर अरब सागरमा आकस्मिक रूपमा पानीमा अवतरण गरेपछि एक चालकदल सदस्य बेपत्ता भएका छन् ।  अमेरिकी नौसेनाको केन्द्रीय कमान्ड सेन्टकमका अनुसार हेलिकोप्टर यूएसएस जर्ज एच डब्ल्यु. बुस विमानवाहक युद्धपोतमा तैनाथ थियो । हेलिकोप्टरले आपत्कालीन अवस्थाका कारण समुद्रमा अवतरण गर्नुपरेको जनाइएको छ ।

नौसेनाले घटनामा कुनै पनि आक्रमण वा शंकास्पद गतिविधिको संकेत नदेखिएको स्पष्ट पारेको छ । हेलिकोप्टरमा रहेका चार चालकदल सदस्यमध्ये तीन जनालाई सकुशल उद्धार गरिएको छ । उनीहरूको स्वास्थ्य अवस्था स्थिर रहेको र उनीहरूलाई यूएसएस जर्ज एच. डब्ल्यु. बुसमा राखिएको अमेरिकी नौसेनाले जनाएको छ ।

बेपत्ता रहेका अर्का चालकदल सदस्यको खोजीका लागि अमेरिकी नौसेनाले अरब सागर क्षेत्रमा खोज तथा उद्धार अभियान जारी राखेको छ । हेलिकोप्टर किन आकस्मिक रूपमा समुद्रमा अवतरण गर्न बाध्य भयो भन्ने कारण अझै खुल्न सकेको छैन । अमेरिकी नौसेनाले घटनाबारे औपचारिक अनुसन्धान सुरु गरिएको जनाएको छ ।