इजरायलले इरानी वार्ताकारको हत्या गर्ने योजना बनाएको दाबी

 इजरायलले यस वर्षको सुरुमा अमेरिका–इरानबिच तनाव अन्त्य गर्ने उद्देश्यले भइरहेको वार्ताका क्रममा इरानका प्रमुख वार्ताकारहरूको हत्या गर्ने योजना बनाएको अमेरिकी सञ्चारमाध्यमहरूले दाबी गरेका छन् ।

द न्यूयोर्क टाइम्स र द वासिङ्टन पोस्टले नाम नखुलाइएका अमेरिकी अधिकारीहरूलाई उद्धृत गर्दै इजरायलले इरानी विदेशमन्त्री अब्बास अराघची तथा इरानका प्रमुख वार्ताकार एवं संसद्का सभामुख मोहम्मद बाघेर घालिबाफलाई निशाना बनाउने योजना बनाएको जनाएको हो ।

द वासिङ्टन पोस्टसँग कुरा गरेका एक अमेरिकी अधिकारीका अनुसार, ‘यदि उनीहरूलाई मारिएको भए वार्ता र कूटनीतिक समाधानको पक्षमा रहेका व्यावहारिक नेताहरू नै समाप्त हुने थिए,’ । द न्यूयोर्क टाइम्सका अनुसार अमेरिकी प्रशासनले सम्भावित जोखिमबारे इरानलाई सचेत गराउन मध्यपूर्वका केही देशमार्फत सन्देश पठाएको थियो । यी दाबीबारे इजरायल वा इरानले तत्काल कुनै आधिकारिक प्रतिक्रिया दिएका छैनन् ।

समाचारमा इजरायलले क्षेत्रीय द्वन्द्व अन्त्यका लागि भइरहेका वार्तालाई प्रभावित पार्ने उद्देश्यले वार्तामा संलग्न पक्षलाई यसअघि पनि निशाना बनाएको उल्लेख गरिएको छ । गत अक्टोबरमा इजरायली सेनाले दोहामा रहेको हमासको एक परिसरमा आक्रमण गरेको थियो । उक्त समयमा हमासका अधिकारीहरूले इजरायलसँग प्रस्तावित युद्धविराम सम्झौताबारे अध्ययन गरिरहेका थिए ।