फ्रान्सेली राष्ट्रपति म्याक्रोनको भ्रमणका क्रममा सिरियाली राजधानीमा विस्फोट

फ्रान्सका राष्ट्रपति इमानुएल म्याक्रोन मंगलबार बिहान सिरियाको राजधानी दमास्कसको केन्द्रमा भएका विस्फोटका घटनापछि सुरक्षित रहेको फ्रान्सेली राष्ट्रपति कार्यालय एलिस प्यालेसले जनाएको छ । म्याक्रोन सिरियाली राष्ट्रपति अहमद अल–शारासँग राष्ट्रपति भवनमा द्विपक्षीय वार्ताका लागि दमास्कसमा रहेका छन् । एक सुरक्षा स्रोतले बीबीसीलाई दिएको जानकारीअनुसार विस्फोट दुईवटा विस्फोटक उपकरणका कारण भएको हो । घटनामा केही व्यक्ति घाइते भएका छन् । 

सिरियाको भ्रमणपछि म्याक्रोन नेटो शिखर सम्मेलनमा सहभागी हुन टर्की जाने कार्यक्रम छ । एलिसे दरबारका अनुसार उनको भ्रमण पूर्वनिर्धारित कार्यक्रमअनुसार नै जारी रहनेछ ।  दमास्कसमा विस्फोट भएको खबर सार्वजनिक भएसँगै सामाजिक सञ्जालमा भाइरल भएका भिडियो तथा तस्वीरहरूमा राजधानीस्थित एउटा होटल नजिकै सवारीसाधनमा आगलागी भएको र बाक्लो धुवाँ उडिरहेको देखिएको छ । घटनास्थलमा उद्धार तथा आपत्कालीन सेवाका कर्मचारीहरू परिचालित भएका थिए । 

विस्फोटको समाचार सार्वजनिक भइरहेकै बेला सिरियाली सरकारी टेलिभिजनले राष्ट्रपति अहमद अल–शाराले राष्ट्रपति भवनमा म्याक्रोनलाई स्वागत गरेको जनाएको थियो । सोमबार साँझ सिरिया पुगेका म्याक्रोन बशार अल–असदको २४ वर्षे शासन अन्त्य भएपछि सिरियाको भ्रमण गर्ने पहिलो युरोपेली संघ (ईयू) का नेता बनेका छन् । यसै जुलाईको सुरुवातमा दमास्कसको मध्यभागमा रहेको भिडभाडयुक्त एउटा क्याफेमा भएको बम विस्फोटमा कम्तीमा नौ जनाको मृत्यु भएको थियो भने अन्य २२ जना घाइते भएका थिए । उक्त जानकारी सिरियाली सरकारी सञ्चारमाध्यमहरूले दिएका थिए ।