हुथीद्वारा साउदी अरबमाथि मिसाइल आक्रमण

रियाद । यमनको सशस्त्र समूह हुथीले साउदी अरबमाथि मिसाइल प्रहार गरेको छ । आफूहरूको नियन्त्रणमा रहेको सना अन्तर्राष्ट्रिय विमानस्थलमा साउदी अरबले हवाई आक्रमण गरेको आरोप लगाएपछि हुथीले यो आक्रमण गरेको हो । 

यस आक्रमणले दुवै पक्षबिच चार वर्षदेखि कायम रहेको अनौपचारिक शान्ति अवधि अन्त्य भएको सङ्केत दिएको छ । साउदी नेतृत्वको सैन्य गठबन्धनका प्रवक्ताका अनुसार हुथी समूहले दक्षिणी क्षेत्रमा लक्षित गरी प्रहार गरेका मिसाइलहरू साउदी हवाई प्रतिरक्षा प्रणालीले बिचमै अवरोध गरी नष्ट गरेको छ ।

हुथी सैन्य प्रवक्ता याह्या सारीले साउदी अरबको अब्हा अन्तर्राष्ट्रिय विमानस्थललाई निशाना बनाएर मिसाइल प्रहार गरिएको बताएका छन् । अब्हा यमनसँग सीमा जोडिएको साउदी अरेबियाको दक्षिणी पहाडी क्षेत्रको प्रमुख सहर हो । सन् २०२२ को मार्चमा अनौपचारिक युद्धविराम लागू भएपछि हुथी समूहले साउदी अरेबियामाथि गरेको यो पहिलो दाबी गरिएको प्रत्यक्ष मिसाइल आक्रमण हो । त्यसअघि हुथीहरूले साउदी अरेबियाको ऊर्जा पूर्वाधारमा पटक–पटक आक्रमण गरेका थिए ।

सोमबारको घटनाले साउदी अरबको दक्षिणी सीमामा पुनः द्वन्द्व चर्किने सम्भावना बढाएको छ । यसअघि अमेरिका–इरान तनावका क्रममा इरानले साउदी अरेबियाको पूर्वी क्षेत्रमा ड्रोन र मिसाइल आक्रमण गरेपछि अप्रिलमा भएको युद्ध विरामसँगै अवस्था केही शान्त बनेको थियो । साउदी अरेबले फारसी खाडीको सट्टा पूर्वी क्षेत्रबाट पश्चिमी तटस्थित लाल सागरसम्म पाइपलाइनमार्फत तेल निर्यात गर्दै आएको छ । तर हुथीसँगको द्वन्द्व पुनः चर्किएमा लाल सागर हुँदै हुने समुद्री ढुवानी र तेल आपूर्तिमा समेत असर पर्न सक्ने विश्लेषण गरिएको छ ।