१० दिनभित्र लगातार तेस्रोपटक क्युबाको नेशनल ग्रिड अवरुद्ध

 क्युबाको नेशनल ग्रिड अवरुद्ध हुँदा १० दिनभित्र तेस्रोपटक देशभरमा बिजुली सेवा ठप्प भएको छ । यसका कारण करिब एक करोड नागरिक विद्युत् सेवाविहीन बनेका छन् । सरकारी स्वामित्वको विद्युत् कम्पनी यूएनईका अनुसार मंगलबार स्थानीय समयअनुसार बिहान ११ बजे देशको सम्पूर्ण विद्युत् सञ्जाल बन्द भएको थियो । क्युबाको ऊर्जा तथा खानी मन्त्रालयले सामाजिक सञ्जालमार्फत सम्पूर्ण विद्युत् प्रणाली पूर्ण रूपमा विच्छेद भएको जनाएको छ ।

यो पछिल्लो विद्युत् संकट क्युबाले दशकौँयताकै गम्भीर आर्थिक संकट झेलिरहेका बेला आएको हो । अमेरिकी तेल नाकाबन्दीका कारण इन्धन अभाव चर्किएको र पुरानो विद्युत् पूर्वाधार थप कमजोर बनेको क्युबाको दाबी छ । अमेरिकी राष्ट्रपति डोनाल्ड ट्रम्पले जनवरीमा क्युबामाथि तेल नाकाबन्दी लागू गरेका थिए । त्यसअघि अमेरिकाले भेनेजुएलाका राष्ट्रपति निकोलस मादुरोलाई सत्ताबाट हटाएपछि भेनेजुएलाबाट क्युबामा हुने सहुलियतपूर्ण तेल आपूर्ति बन्द गरिएको थियो । अमेरिकी दबाबपछि मेक्सिकोले पनि क्युबातर्फको इन्धन आपूर्ति रोकेको बताइएको छ ।

अन्तर्राष्ट्रिय ऊर्जा एजेन्सीका अनुसार सन् २०२३ सम्म क्युबाले आफ्नो आवश्यक तेलको करिब ४० प्रतिशत मात्रै स्वदेशमै उत्पादन गरिरहेको थियो । बाँकी आवश्यकताका लागि उसले आयातित इन्धनमा निर्भर रहनुपरेको थियो । ट्रम्प प्रशासनले भने यी प्रतिबन्धहरू क्युबाको कम्युनिस्ट सरकारमाथि लोकतान्त्रिक निर्वाचन गराउन र आफूले राजनीतिक बन्दी भनेकाहरूलाई रिहा गर्न दबाब दिन लागू गरिएको जनाएको छ ।

बारम्बारको विद्युत् अवरोधले क्युबाभर जनआक्रोश बढ्दै गएको छ । गत साता हाभानाका विभिन्न स्थानमा नागरिकहरूले भाँडा बजाउँदै बत्ती बाल्न माग गरेका थिए । अघिल्ला दुई देशव्यापी ब्ल्याकआउटपछि पनि सम्पूर्ण विद्युत् सेवा पुनः सञ्चालन गर्न २४ घण्टाभन्दा बढी समय लागेको थियो । क्युबाली अधिकारीहरूका अनुसार इन्धन अभाव र सन् १९६० तथा १९८० को दशकमा निर्माण गरिएका पुराना विद्युत् पूर्वाधारका कारण राष्ट्रिय विद्युत् प्रणाली पटक–पटक ध्वस्त हुने अवस्था सिर्जना भएको छ ।