वारेन बफेटले यस वर्ष दिएनन् गेट्स फाउन्डेसनलाई दान

अमेरिकी अर्बपति लगानीकर्ता वारेन बफेटले यस वर्ष आफ्नो परम्परागत वार्षिक दान गेट्स फाउन्डेसनलाई नदिई आफ्नै परिवारसँग सम्बन्धित चारवटा परोपकारी संस्थालाई हस्तान्तरण गरेका छन् । बफेट गेट्स फाउन्डेसनका संस्थापक ट्रस्टीमध्ये एक थिए ।

उनले बिल गेट्स र उनकी तत्कालीन पत्नी मेलिन्डा फ्रेन्च गेट्ससँग मिलेर अर्बपतिहरूलाई आफ्नो सम्पत्तिको ठुलो हिस्सा दान गर्न प्रोत्साहित गर्ने द गिभिङ प्लेज अभियान पनि सुरु गरेका थिए । सन् २०२१ मा फाउन्डेसनको बोर्डबाट राजीनामा दिएपछि पनि उनले प्रत्येक वर्ष अर्बौँ डलर बराबरको दान गर्दै आएका थिए ।

तर यस वर्ष बफेटले आफ्नो नियमित दान रोकेका छन् । वाल स्ट्रिट जर्नलका अनुसार गेट्स फाउन्डेसनले बाह्य कानुनी विज्ञमार्फत सञ्चालन गरिरहेको समीक्षा पूरा नहुन्जेल उनले दान रोक्ने निर्णय गरेका हुन् । उक्त समीक्षामा फाउन्डेसन र यौन अपराधीका रूपमा दोषी ठहरिएका जेफ्री एपस्टिनबीचको सम्बन्धबारे अनुसन्धान भइरहेको छ । 

गेट्स फाउन्डेसनलाई दान नदिएपनि आफ्नो परोपकारी अभियान निरन्तर चल्ने ९५ वर्षीय बफेटले बताएका छन् । उनले एक विज्ञप्तिमा आफ्ना तीन सन्तानले सन् २०३४ डिसेम्बर ३१ भित्र बर्कशायर ह्याथवेमा रहेको आफ्नो सम्पूर्ण सेयर दानमार्फत वितरण गरिसक्ने अपेक्षा व्यक्त गरेका छन् ।

हाल बर्कशायर ह्याथवेको बजार मूल्य करिब ११ खर्ब डलर छ भने बफेटसँग कम्पनीको करिब ३० प्रतिशत स्वामित्व छ । यसअघि बफेटको अधिकांश दान गेट्स फाउन्डेसनलाई जाने गरेको थियो । फाउन्डेसनका अनुसार सन् २०२२ सम्म बफेटले ३६ अर्ब अमेरिकी डलरभन्दा बढी दान गरिसकेका थिए । त्यसपछि पनि उनले हरेक वर्ष बर्कशायर ह्याथवेको अर्बौँ डलर बराबरको सेयर दान गर्दै आएका थिए ।

बिल गेट्स र जेफ्री एपस्टिनबिचको सम्बन्ध सार्वजनिक भएपछि भने बफेट र गेट्सबीचको मित्रतामा असर परेको बताइएको छ । बफेटले यस वर्षको मार्चमा दिएको एक अन्तर्वार्तामा आफू अहिले गेट्ससँग संवाद गर्ने नगरेको तर आफूले विगतमा गेट्स फाउन्डेसनलाई दिएको दानप्रति कुनै पछुतो नरहेको स्पष्ट पारेका थिए ।

उता, बिल गेट्सले गत महिना अमेरिकी प्रतिनिधिसभाको एक समितिसमक्ष आफूलाई एपस्टिनका अपराधबारे कुनै जानकारी नभएको बताएका थिए । उनले यसअघि फाउन्डेसनका कर्मचारीसँग एपस्टिनसँगको सम्बन्धलाई ठुलो गल्ती भएको स्वीकार्दै माफी मागेका थिए, तर आफूले कुनै व्यक्तिगत गलत काम नगरेको दाबी गर्दै आएका छन् ।

बफेटले भने आफूले जीवनमा कहिल्यै जेफ्री एपस्टिनलाई नभेटेको र उनीसँग कुनै सम्पर्क नरहेको बताएका छन् । साथै, एपस्टिन प्रकरणबारे आफूले बिल गेट्ससँग पनि कुनै छलफल नगरेको उनको भनाइ छ । यो विषय स्पष्ट नभएसम्म धेरै कुरा गर्नु उचित नहुने बताउँदै उनले अदालतमा शपथ लिएर एपस्टिन–गेट्स सम्बन्धबारे साक्षी दिनुपर्ने अवस्था नआओस् भन्ने चाहना व्यक्त गरे ।