विश्वका उत्कृष्ट ५ 'अन-टाइम पर्फर्मेन्स' विमान कम्पनीको सूचीमा एअर इन्डिया

काठमाडौँ । भारतीय ध्वजावाहक विमान कम्पनी एअर इन्डियाले विश्वका सर्वाधिक समयनिष्ठ (अन-टाइम पर्फर्मेन्स) विमान कम्पनीहरूको सूचीमा आफूलाई शीर्ष स्थानमा उभ्याउन सफल भएको छ। 

एभिएसन एनालिटिक्स फर्म ‘सिरियम’ ले सार्वजनिक गरेको जुन २०२६ को प्रतिवेदन अनुसार, एअर इन्डिया विश्वभरमै चौथो सबैभन्दा समयनिष्ठ एयरलाइन बनेको हो। 

सिरियमको प्रतिवेदन अनुसार, एअर इन्डियाले जुन महिनामा कुल १५,१३५ उडानहरू सञ्चालन गरेकोमा ८६.८५ प्रतिशत उडानहरू तोकिएको समयमा अवतरण गराउन सफल भएको छ। यसैगरी, कम्पनीको समयमा उडान भर्ने दर (डिपार्चर रेट) ८६.२३ प्रतिशत रहेको छ भने 'कम्प्लिसन फ्याक्टर' ९९.७ प्रतिशत रहेको छ। यसको अर्थ एअर इन्डियाले तय गरेका झण्डै सबै उडानहरू योजना अनुसार नै सफलतापूर्वक सञ्चालन भएका छन्।
दिल्ली र मुम्बई जस्ता भारतका दुई ठूला र व्यस्त विमानस्थलहरूलाई प्रमुख केन्द्र (हब) बनाएर उडान भर्ने एअर इन्डियाले अत्यधिक चाप र एयर ट्राफिक कन्ट्रोलका चुनौतीहरूको बाबजुद यो सफलता हात पारेको हो। 

विमानस्थलको भीड र प्राविधिक अवरोधहरूले नेटवर्कमा पार्ने प्रभावलाई कम गर्न कम्पनीले पछिल्लो समय उडान प्रस्थानको पञ्चुअलिटीमा सुधार, विमानको ग्राउन्ड टर्नअराउन्ड प्रक्रियामा तीव्रता र रियल-टाइम नेटवर्क मनिटरिङ जस्ता उपायहरू अवलम्बन गर्दै आएको छ।

कम्पनीले प्रतिकूल मौसम, हवाई क्षेत्रमा हुने प्रतिबन्ध वा प्राविधिक समस्या जस्ता अनपेक्षित अवरोधहरूलाई प्रभावकारी ढंगले व्यवस्थापन गर्न बलियो आकस्मिक योजना र अन्तर-कार्यात्मक समन्वयमा जोड दिएको जनाएको छ। यी प्रयासहरूले उडान सञ्चालनमा स्थिरता ल्याउन र यात्रुहरूलाई भरपर्दो सेवा सुनिश्चित गर्न मद्दत पुर्‍याएको कम्पनीको दाबी छ।

एअर इन्डियाले हाल आफ्नो रूपान्तरण अभियान अन्तर्गत विश्वकै ठूलोमध्येको एक विमान खरिद योजना अघि बढाइरहेको छ। यसअन्तर्गत एयरबस र बोइङका ६०० वटा नयाँ विमानहरूको अर्डर दिइएको छ। पछिल्लो छ महिनामा मात्रै तीनवटा नयाँ बोइङ ७८७-९ विमानहरू थपिएका छन् भने सन् २०२६ को अन्त्यसम्ममा थप बोइङ ७८७-९ र एयरबस ए३५०-१००० विमानहरू भित्रिने क्रममा रहेका छन्।

नयाँ विमान थप्ने मात्र नभई, एअर इन्डियाले आफ्ना पुराना 'वाइडबडी' विमानहरूको आन्तरिक साजसज्जा र सुविधालाई पनि व्यापक रूपमा स्तरोन्नति गरिरहेको छ।