अध्यागमनको हिरासतबाट चिनियाँ छुटाइदिने भन्दै ठगीमा पूर्वएसएसपी नै संलग्न

 अध्यागमन विभागको हिरासतमा थुनामा रहेका चिनियाँ नागरिकहरूलाई ‘छुटाइदिन्छौं’ भनेर पूर्वएसएसपी सहितको समूहले ठगी गरेको भेटिएको छ। 

असार १२ मा ललितपुरको सानेपाबाट पक्राउ परेर विभागको हिरासतमा थुनामा रहेका ९ जना चिनियाँ नागरिकलाई छुटाउने आश्वासन दिएर आरोपीहरूले रकम असुल गरेका हुन्।

ठगीमा संलग्न आरोपमा प्रहरीले ३ जनालाई पक्राउ गरेको छ। पक्राउ पर्नेमा उदयपुरको कटारी घर भएर ललितपुर बस्ने ३८ वर्षीय बिक्रम बहादुर थापा, पश्चिम नवलपरासी घर भएर ललितपुर बस्ने ५९ वर्षीय गोपाल कुमार गुरुङ र सर्लाही घर भएर काठमाडौँ बस्ने ५२ वर्षीय नारद प्रसाद खतिवडा छन्। आरोपीहरूले चिनियाँ नागरिक र अध्यागमनले बरामद गरेको १५ थान राहदानी समेत निकालिदिने भन्दै चिनियाँ नागरिकहरूसँग साझेदार नेपालीसँग ९ लाख रकम लिएका हुन्। 

आरोपीहरूले चिनियाँ नागरिक छुटाउने र राहदानी पनि फिर्ता दिलाउँछौ भनेर ७२ लाख रुपैयाँ लेनदेन गर्ने गरी मोलमोलाइ गरेको उपत्यका अपराध अनुसन्धान कार्यालयका सूचना अधिकारी (एसपी) रामेश्वर कार्कीले रातोपाटीलाई बताए । अपराध अनुसन्धान कार्यालयको टोलीले उनीहरूलाई साउन ४ मा काठमाडौँ उपत्यकाबाट पक्राउ गरेको हो। ठगीमा संलग्न आरोपमा पक्राउ परेका गोपाल बहादुर गुरुङ सशस्त्र प्रहरीका पूर्व एसएसपी हुन् । २०५८ मा प्रहरीको नायव निरीक्षकबाट स्थानान्तरण भएर उनी सशस्त्रमा गएका थिए। 

उनी एसएसपी भएर अवकाशमा गएको पाइएको छ । पक्राउ परेका अर्का आरोपी नारद प्रसाद खतिवडा कलाकार हुन् । बिक्रम बहादुर थापा १२ लाख २५ हजारको बैंकिङ्ग कसुर मुद्दामा पनि फरार देखिएका छन् । आरोपीहरूमाथि थप अनुसन्धान र कारबाहीका लागी अनुसन्धान कार्यालयले जिल्ला प्रहरी परिसर काठमाडौँमा पठाएको छ । काठमाडौँ प्रहरीले घटनाबारे अनुसन्धान गरिरहेको छ।