चीनमा टाइफुन, लाखौँ मानिस सुरक्षित स्थानमा सारिए

शक्तिशाली टाइफुन ‘नौल’ दक्षिणी चीनमा ठोक्किएको छ । टाइफुनको प्रभाव हङकङ र ग्वाङ्डोङ प्रान्तमा विशेष रूपमा परेको छ, जहाँ तीव्र हावा र भारी वर्षाका कारण ग्वाङ्डोङमा लाखौँ मानिसलाई सुरक्षित स्थानमा सारिएको छ ।

चीनको राष्ट्रिय मौसम केन्द्रका अनुसार टाइफुन आइतबार बिहान स्थानीय समयअनुसार करिब ३ः५० बजे दक्षिणी ग्वाङ्डोङ प्रान्तको हुइझोउ सहरअन्तर्गत हुइदोङ काउन्टीको तटीय क्षेत्रमा भूभागमा प्रवेश गरेको थियो । चीनको सरकारी समाचार संस्था सिन्ह्वाका अनुसार यस वर्ष चीनमा भूभागमा प्रवेश गरेको यो अहिलेसम्मकै सबैभन्दा शक्तिशाली टाइफुन हो ।

हङकङ मौसम वेधशालाले टाइफुनको केन्द्रनजिक अधिकतम ११० किलोमिटर प्रतिघण्टाको स्थिर हावाको गति रहेको जनाएको छ । टाइफुन ग्वाङ्डोङको भित्री भूभागतर्फ अघि बढ्दै क्रमशः कमजोर बन्दै गए पनि यसले क्षेत्रका विभिन्न स्थानमा तीव्र हावा र भारी वर्षा गराएको छ ।

चीन राष्ट्रिय रेडियोका अनुसार आइतबार बिहानसम्म ग्वाङ्डोङमा ७ लाख १५ हजारभन्दा बढी मानिसलाई सुरक्षित स्थानमा सारिएको थियो । शनिबार मात्रै करिब ३ लाख ४० हजार मानिसको उद्धार गरिएको अधिकारीहरूले बताएका थिए । राष्ट्रिय मौसम केन्द्रले सप्ताहन्तभरि ग्वाङ्डोङको दक्षिणी भाग र फुजियान प्रान्तको दक्षिणपूर्वी क्षेत्रमा भारी वर्षा र शक्तिशाली हावाको चेतावनी दिएको छ । सरकारी टेलिभिजन सीसीटीभीका अनुसार ग्वाङ्डोङको तटीय हुइलाई काउन्टीमा धेरै रूखहरू ढलेका छन् ।

हङकङ विमानस्थल प्राधिकरणका अनुसार आइतबार करिब ३५० उडान रद्द भएका छन् । स्थानीय अधिकारीहरूका अनुसार टाइफुनका कारण शहरभर कम्तीमा नौ जना घाइते भएका छन् । ताइवानको केन्द्रीय मौसम प्रशासनका अनुसार नौलले दक्षिणी र पूर्वी ताइवानका केही क्षेत्रमा वर्षा गराएको छ । शनिबार यो ताइवानको दक्षिणी समुद्री क्षेत्र हुँदै टापुबाट टाढिँदै गएको थियो । यसअघि जुलाई ११ मा आएको टाइफुन बाभीका कारण पूर्वी चीनमा तीव्र हावा र वर्षा भएपछि २० लाखभन्दा बढी मानिसलाई सुरक्षित स्थानमा सारिएको थियो । त्यस्तै, ट्रपिकल स्टर्म मेसाक जुलाई ३ मा दक्षिणी चीनमा ठोक्किएको थियो ।