मोरक्कोबाट स्पेनको स्युटा प्रवेश गर्ने आप्रवासीको संख्या बढ्यो, ९ जनाको मृत्यु

मोरक्कोबाट हजारौँ आप्रवासी स्पेनको स्वायत्त क्षेत्र स्युटामा प्रवेश गरेपछि सीमा क्षेत्रमा ठुलो सङ्कट उत्पन्न भएको छ । सीमा पार गर्ने क्रममा भएको भागदौड र समुद्री मार्गको जोखिमका कारण कम्तीमा ९ जनाको मृत्यु भएको छ । यस घटनापछि स्युटाका स्थानीय अधिकारीहरूले स्पेन सरकारसँग राष्ट्रिय आपत्काल घोषणा गर्न माग गरेका छन् । उनीहरूले थप सुरक्षा बल र सेना परिचालन गर्न समेत माग गरेका छन् ।

स्युटास्थित स्पेनी सिभिल गार्डका प्रतिनिधिहरूका अनुसार सीमा क्षेत्रमा अवस्था पूर्ण रूपमा अव्यवस्थित बनेको छ । हजारौँ मानिसहरू सीमा पार गरिरहेको भए पनि उनीहरूको यकिन सङ्ख्या निर्धारण गर्न कठिन भएको जनाइएको छ । मानवअधिकारकर्मीहरूले पनि यस घटनालाई असाधारण अवस्था भन्दै वर्णन गरेका छन् । सामाजिक सञ्जाल र भिडियोहरूमा ठुलो सङ्ख्यामा मानिसहरू समुद्री किनार हुँदै स्युटाको सडकमा प्रवेश गरिरहेको देखिएको छ । अधिकांश आप्रवासी मोरक्कोका युवा भए पनि महिला र बालबालिका सहितका परिवार पनि सहभागी थिए ।

विश्लेषकहरूका अनुसार पछिल्ला दिनहरूमा स्युटा पुग्ने प्रयास गर्ने आप्रवासीहरूको सङ्ख्या अचानक बढेको हो । धेरैले समुद्रमा पौडिएर स्पेन प्रवेश गर्ने प्रयास गरेका थिए । यसअघि स्पेनको सर्वोच्च अदालतले समुद्री मार्गबाट स्पेन पुगेका आप्रवासीलाई कानुनी प्रक्रिया पूरा नगरी तुरुन्तै फिर्ता पठाउन नहुने फैसला गरेको थियो ।

केही अधिकारीहरूले यही निर्णयले आप्रवासीलाई आकर्षित गरेको बताएका छन् । तर मोरक्कोका सामाजिक अभियन्ताहरूले भने अधिकांश आप्रवासीलाई यस्तो कानुनी निर्णयबारे जानकारी नै नहुने भएकाले गरिबी, रोजगारीको अभाव र हिंसाबाट बच्ने प्रयास नै मुख्य कारण भएको बताएका छन् । स्पेनको गृह मन्त्रालयले मोरक्को सरकारसँग मिलेर सीमा नियन्त्रण गर्ने र अवैध रूपमा प्रवेश गरेका व्यक्तिहरूलाई यथाशीघ्र फिर्ता पठाउने विषयमा सहकार्य भइरहेको जनाएको छ । स्पेनका गृहमन्त्री फर्नान्डो ग्रान्दे–मार्लास्काले पनि परिस्थितिको अनुगमन गर्न स्युटा भ्रमण गर्ने कार्यक्रम रहेको बताइएको छ ।

स्युटा उत्तर अफ्रिकाको मोरक्कोको तटमा रहेको स्पेनको स्वायत्त क्षेत्र हो । यो युरोपेली सङ्घको बाह्य सीमा भएकाले अफ्रिकाबाट युरोप प्रवेश गर्न खोज्ने आप्रवासीहरूको प्रमुख मार्ग मानिन्छ । यसअघि मे २०२१ मा पनि दुई दिनभित्र ८ हजारभन्दा बढी आप्रवासी स्युटामा प्रवेश गरेका थिए । जसका कारण स्पेन र मोरक्कोबिच कूटनीतिक तनाव सिर्जना गरेको थियो । यस पटकको घटनाले पनि युरोपमा आप्रवासन व्यवस्थापन र सीमा सुरक्षासम्बन्धी चुनौती फेरि एक पटक गम्भीर रूपमा उठाएको छ ।