पेरुमा पर्यटक बोकेको विमान दुर्घटना, १३ जनाको मृत्यु

पेरुमा पर्यटक बोकेको विमान दुर्घटना हुँदा विमानमा सवार १३ जनाको मृत्यु भएको स्थानीय सञ्चारमाध्यम र पेरुका अधिकारीहरूले बताएका छन्।

शनिबार विमान पेरुको प्रसिद्ध नास्का रेखा रहेको पुरातात्त्विक क्षेत्रमाथि उडिरहेको बेला दुर्घटनामा परेको थियो। विमानमा ११ जना यात्रु र दुई जना पाइलट गरी १३ जना सवार थिए।

दुर्घटनाको कारण र विमानमा सवार यात्रुहरूको पहिचान भने अझै स्पष्ट भइसकेको छैन। नास्का रेखा दक्षिणी पेरुमा रहेको लोकप्रिय पर्यटकीय गन्तव्य तथा युनेस्को विश्व सम्पदा क्षेत्र हो। मरुभूमिको बालुवामा प्राचीन सभ्यताका मानिसहरूले बनाएका विशाल आकृतिका चित्रहरू यहाँ रहेका छन्।

‘दुर्घटना अत्यन्त गम्भीर भएकाले कोही पनि जीवित छैनन्। अहिलेसम्म हामीले चारवटा शव फेला पारेका छौँ,’ प्रहरी मेजर जर्ज आन्द्रादेले एएफपीलाई बताएका छन्। पेरुको पिस्कोस्थित विमानस्थलबाट उडेपछि स्थानीय समयअनुसार शनिबार दिउँसो करिब १ बजे (बेलायती समयअनुसार साँझ ७ बजे) पुएब्लो भिएहो क्षेत्रमा विमान दुर्घटनामा परेको थियो। रोयटर्सका अनुसार नागरिक उड्डयन महानिर्देशनालयका निरीक्षक विलियम अकोस्टाले मृतकमध्ये इटालीका पर्यटक पनि रहेको हुन सक्ने बताएका छन्। रोयटर्सले सार्वजनिक गरेको भिडियोमा दुर्घटनास्थलमा धुवाँको मुस्लो उठिरहेको र अग्निनियन्त्रकहरूले भग्नावशेषमाथि पानी छर्किरहेको देखिन्छ।

नास्का प्रान्तीय नगरपालिकाले स्पेनी भाषामा अनलाइन जारी गरेको विज्ञप्तिमा दुर्घटनाप्रति ‘गहिरो दुःख’ व्यक्त गर्दै मृतकका परिवारप्रति ‘हार्दिक समवेदना’ प्रकट गरेको छ। विज्ञप्तिका अनुसार दुर्घटनामा परेको विमान स्थानीय पेरुभियन वायुसेवा कम्पनी एरोडियानाको थियो। घटनाबारे प्रतिक्रिया लिन बीबीसीले उक्त एयरलाइन्ससँग सम्पर्क गरेको जनाएको छ।

नास्का रेखामाथि विमान दुर्घटना भएको यो पहिलो घटना होइन

प्रसिद्ध नास्का रेखामाथि पछिल्ला केही दशकमा विमान दुर्घटना भएको यो पहिलो घटना होइन। २०२२ मा नास्का रेखा क्षेत्रमाथि उडिरहेको अर्को सानो पर्यटक विमान दुर्घटनामा पर्दा त्यसमा सवार सातै जनाको मृत्यु भएको थियो। त्यसैगरी २०१० मा पनि पर्यटक बोकेको एउटा विमान उक्त क्षेत्रमाथि दुर्घटनामा परेको थियो। त्यस दुर्घटनामा विमानमा सवार छ जनाको मृत्यु भएको थियो।