अमेरिकी सेनाले किन बन्द गर्दैछ यूरोपमा रहेको आफ्नो महत्त्वपूर्ण युनिट ?

अमेरिकी सेनाले युरोपमा ड्रोन युद्ध प्रविधिमा काम गरिरहेको एउटा विशेष युनिटलाई विघटन गर्ने निर्णय गरेको छ । लगभग एक वर्षदेखि यो युनिटले ड्रोन विकास, तैनाती र ड्रोनमा आधारित लडाई रणनीतिहरूको प्रयोग गरिरहेको थियो । अब यसलाई परम्परागत हवाई इन्फन्ट्री बटालियनको रूपमा सञ्चालन गर्न निर्देश दिइएको छ । 

यो युनिट इटाली र जर्मनीमा तैनाथ १७३ औँ एयरबोर्न ब्रिगेडको हिस्सा हो । गत नोभेम्बरमा लगभग ६०० सैनिकहरूको बटालियन विशेष रूपमा ड्रोन युद्धको लागि डिजाइन गरिएको थियो । यसको लक्ष्य आवश्यक परेमा कुनै पनि युद्धभूमिमा प्रयोग गर्न सकिने प्रविधि र रणनीतिहरू विकास गर्नु थियो ।

युक्रेन र रुस बिचको लामो समयदेखि चलिरहेको युद्धमा ड्रोनको व्यापक प्रयोगबाट सिक्न अमेरिकी सेनाले यो प्रयोग सुरु गरेको थियो । युक्रेनले युद्धमा कम लागतका ड्रोनहरू, विशेष गरी एफपीभी ड्रोनहरू व्यापक रूपमा प्रयोग गरेको छ । १७३ औँ एयरबोर्न ब्रिगेडका सैनिकहरूले इटालीको एक विशेष एफपीची ड्रोन प्रयोगशालामा आफ्नै आक्रमण ड्रोनहरू पनि विकास गरिरहेका थिए । सेनाका अनुसार, सैनिकहरू ड्रोनहरूमा काम गरिरहेका थिए, साथै कृत्रिम बुद्धिमत्ता र शत्रुको जाम गर्ने प्रविधिबाट बचाउन सक्ने ड्रोनहरू विकास गरिरहेका थिए ।

अमेरिकी सेनाका अधिकारीहरूका अनुसार, विशेष ड्रोन युनिटले यस महिना र अर्को महिना जर्मनीमा दुई प्रमुख सैन्य अभ्यास पछि आफ्नो प्रयोगात्मक कार्य पूरा गर्नेछ । यसपछि, युनिटले विगत एक वर्षमा प्राप्त गरेको जानकारी र अनुभव सेनालाई हस्तान्तरण गरिनेछ । सेनाले यी अनुभवहरू भविष्यमा सेना तैनाथी, सैन्य पूर्वाधार र नयाँ ड्रोन–सम्बन्धित प्रविधिको विकासको योजना बनाउन प्रयोग गरिने बताएको छ ।

इरान युद्धमा अमेरिकाले ड्रोनबाट युद्ध लड्नुको महत्त्वबारे सिक्न जरुरी भएकै समयमा यो निर्णय आएको हो । युद्धमा इरानले सस्ता खालका शाहेद ड्रोनहरूमार्फत अमेरिकी जहाज र सैन्य अड्डाहरूमा आक्रमण गरेर अमेरिकी सैनिकहरू मार्ने, हेलिकप्टर खसाल्न र महँगो इन्टरसेप्टर मिसाइलहरूको प्रयोग गर्न अमेरिकालाई बाध्य पार्ने काम गरिरहेको छ ।