अमेरिकी ट्यारिफको जवाफमा ५० प्रतिशत ट्यारिफ लगाउँदै क्यानडा

 अमेरिकाले क्यानडाबाट आयात हुने करिब २० अर्ब डलर बराबरका सामानमा ५० प्रतिशत शुल्क लगाएपछि क्यानडाले पनि त्यसको प्रतिकारमा ‘डलर बराबर डलर’ शुल्क लगाउने घोषणा गरेको छ । क्यानडासँगको व्यापार सम्झौताको प्रयास असफल भएपछि अमेरिकाले तीन दिन पर सारेको ट्यारिफ शनिबारदेखि लागू भएको थियो । 

यसको जवाफमा क्यानडाका प्रधानमन्त्री मार्क कार्नीले जस्तालाई तस्तै गर्दै अमेरिकाबाट आयात हुने विभिन्न वस्तुमा समान दरमा प्रतिशोधात्मक शुल्क लगाउने घोषणा गरे । क्यानडाको नयाँ शुल्क आगामी सेप्टेम्बर ८ देखि लागू हुनेछ । यो स्टिल, दुग्धजन्य पदार्थ, विद्युतीय तथा घरेलु उपकरण, कृषि उपकरण, पल्प तथा कागज र इलेक्ट्रोनिक्सलगायत वस्तुमा लागू हुने जनाइएको छ ।

ओटावामा आयोजित पत्रकार सम्मेलनमा कार्नीले अमेरिकाले पछिल्ला दिनमा राखेका नयाँ सर्तहरू क्यानडाका लागि आर्थिक रूपमा अव्यावहारिक र अनुचित भएको बताए । उनका अनुसार ती सर्तले सम्भावित व्यापार सम्झौताबाट क्यानडाले पाउने फाइदामाथि नै प्रश्न उठाएको छ । कार्नीले भने, ‘उनीहरूले धेरै मागे, तर बदलामा निकै कम प्रस्ताव गरे,’ । व्यापार सम्झौता टुंग्याउन क्यानडाले केही कदम चाल्न तयार भएको थियो । गत वर्ष अमेरिकाविरुद्ध लगाइएका प्रतिशोधात्मक शुल्क हटाउने तथा अमेरिकी मदिराजन्य उत्पादनलाई क्यानडाका पसलमा पुनः बिक्री गर्न दिने प्रस्तावसमेत क्यानडाले अघि सारेको थियो ।

तर अटोमोबाइललगायत प्रमुख उद्योगका लागि आवश्यक आर्थिक सर्तमा अमेरिका सहमत नभएको क्यानडाको भनाइ छ । महत्वपूर्ण खनिजको विषयमा भने क्यानडाले अमेरिकालाई विशेष वा एकाधिकार पहुँच दिन नसक्ने कार्नीले स्पष्ट पारे । अमेरिकी राष्ट्रपति डोनाल्ड ट्रम्प र प्रधानमन्त्री कार्नी तथा दुवै देशका उच्च व्यापार अधिकारीहरूबीच पछिल्लो एक सातादेखि लगातार प्रत्यक्ष सम्पर्क भइरहेको थियो । यसअघि ट्रम्पले नयाँ शुल्क कार्यान्वयन गर्नुपर्ने समय तीन दिन पछि सारेका थिए । यसै क्रममा ट्रम्पले साताको सुरुवातमा ‘हामी क्यानडासँग सम्झौतामा पुगेका छौं’ भनेका थिए । तर सम्झौताको अन्तिम दस्तावेज तयार हुन बाँकी रहेको बताइएको थियो ।

अमेरिकी व्यापार प्रतिनिधि जेमिसन ग्रियरले शनिबार क्यानडाले यसअघि सहमति भएका सर्तअनुसार व्यापार सम्झौतालाई अन्तिम रूप दिन अस्वीकार गरेको आरोप लगाए । उनका अनुसार प्रस्तावित सम्झौतामा स्टिल, एल्युमिनियम, अटोमोबाइल र काठजन्य सामग्रीमा उल्लेख्य शुल्क कटौती तथा आर्थिक र राष्ट्रिय सुरक्षा क्षेत्रमा महत्वपूर्ण साझेदारीको व्यवस्था थियो । ग्रियरले क्यानडाले नयाँ माग थप्नुका साथै यसअघि गरेका केही प्रतिबद्धताबाट पछि हटेकाले दुवै पक्षबीच पछिल्ला दिनमा बनेको सहमतिको सन्तुलन बिग्रिएको दाबी गरे ।

क्यानडाले अमेरिकी शुल्कको जवाफमा प्रतिशोधात्मक कदम चाल्ने घोषणा गरेपछि अमेरिकाले पनि क्यानडाविरुद्ध थप कदम चाल्ने संकेत दिएको छ । ग्रियरले अमेरिकाले क्यानडाको कदमको जवाफमा आफ्ना प्रतिकारात्मक उपाय अघि बढाउने बताए पनि त्यसको विस्तृत विवरण भने सार्वजनिक गरेनन् । ट्रम्प दोहोर्याएर राष्ट्रपति बनेयता अमेरिका–क्यानडा व्यापार सम्बन्ध थप तनावपूर्ण बन्दै गएको देखाएको छ ।